საქართველოსა და რუსეთს შორის რეალური ურთიერთობების აღდგენა მხოლოდ საქართველოს სრული დეოკუპაციის შემდეგ მოხდება. ამის შესახებ განცხადება საპარლამენტო უმრავლესობის წარმომადგენელმა გოკა გაბაშვილმა რუსეთის პრეზიდენტის დღევანდელი განცხადების კომენტირებისას გააკეთა.
"რია ნოვოსტის" ინფორმაციით, დიმიტრი მედვედევმა დადებითად შეაფასა ლარსის სასაზღვრო პუნქტის გახსნაზე მიღებული გადაწყვეტილება და ისიც აღნიშნა, რომ დადგება დრო, როცა რუსეთ-საქართველოს შორის სავიზო რეჟიმი გაუქმდება და საქართველო რუსეთს შორის პირდაპირი საჰაერო მიმოსვლა აღდგება.
ხელისუფლებაში ამ განცხადებას "პოლიტიკური პიარისთვის~ გამიზნულად აფასებენ და აცხადებენ, რომ რუსეთსა და საქართველოს შორის ნებისმიერი ურთიერთობა მხოლოდ ქვეყნის დეოკუპაციის შემდეგ იქნება შესაძლებელი.
"საქართველოსა და რუსეთს შორის რეალური დაახლოება და ურთიერთობების აღდგენა ჩვენს ინტერესებშიც შედის, მაგრამ ეს მოხდება მხოლოდ საქართველოს დეოკუპაციის გზით. ხოლო, როცა საქართველოს ოკუპაციის პროცესი ისევ გრძელდება, ახალ ურთიერთობებზე საუბარი შეუძლებელია", - განაცხადა გაბაშვილმა და აღნიშნა, რომ თუ საქართველოს მიმართ მიდგომა რუსეთის ახალი ან ახლანდელი ხელმძღვანელების მხრიდან შეიცვლება, საუბარი იქნება რეალური ურთიერთობების აღდგენაზე.
ლარსის სასაზღვრო პუნქტის გახსნასთან დაკავშირებით, გაბაშვილი აცხადებს, რომ ეს საქართველოს მოქალაქეების ინტერესებში შედის და საქართველოს ხელისუფლების კონტროლის ქვეშ განხორციელდება.
