აშშ-ის სახელმწიფო მდივანმა მარკო რუბიომ ბაჰრეინში ვიზიტის დროს ჟურნალისტებს განუცხადა, რომ გასულ წელს აშშ-ის პრეზიდენტ დონალდ ტრამპსა და რუსეთის პრეზიდენტ ვლადიმირ პუტინს შორის ანკორიჯში გამართულ სამიტზე უკრაინასთან დაკავშირებით არანაირი შეთანხმება არ გაფორმებულა.
მისი თქმით, შეხვედრის დროს მხოლოდ შესაძლო შეთანხმების წინადადებები განიხილებოდა ომის დასრულებასთან დაკავშირებით.
„ჩვენ რეალურად ვიმუშავეთ ამ საკითხის ყველა სხვა დეტალზე, შეგვეძლო თუ არა შეთანხმებების მიღწევა, იმის გათვალისწინებით, რაც ალასკაზე იყო, მაგრამ ალასკაზე არ ყოფილა არცერთი შეთანხმება, რომელიც ომს დაასრულებდა“, - თქვა მან.
რუბიომ ასევე დაამატა, რომ ტრამპი კვლავ მზად არის „ითამაშოს ნებისმიერი კონსტრუქციული როლი“, რათა მიღწეულ იქნას უკრაინაში ომის გრძელვადიანი შეწყვეტა.
„ეს დამღლელია ევროპისთვის, განსაკუთრებით უკრაინისთვის და სულ უფრო მეტად რუსეთისთვისაც. ამიტომ, თუ ჩვენ მზად ვართ ნაბიჯი გადავდგათ და კონსტრუქციული როლი ვითამაშოთ, თუ ეს შესაძლებელია, მხარეების დაახლოება და ომის დასრულება სწორედ ეს არის, რის გაკეთებასაც პრეზიდენტი უკვე წელიწადნახევარია ცდილობს. თუმცა ალასკაზე შეთანხმება არ ყოფილა - იყო მხოლოდ წინადადება, რომელიც შეთანხმებად არ ქცეულა“, - განაცხადა რუბიომ.
რუსეთის პრეზიდენტის თანაშემწე იური უშაკოვმა და საგარეო საქმეთა მინისტრმა სერგეი ლავროვმა აშშ დაადანაშაულეს„ანკორიჯის სულის“ ღალატში - კონცეფციის, რომლითაც მოსკოვი საკუთარ იმედებს უკრაინის კაპიტულაციასთან დაკავშირებით.
ბოლო სამი დღის განმავლობაში რუსმა ოფიციალურმა პირებმა განაცხადეს, რომ შეერთებულმა შტატებმა თითქოს უარი თქვა იმ ვალდებულებებზე, რომლებიც, მათი თქმით, გასულ წელს ალასკაზე ტრამპისა და პუტინის შეხვედრის დროს იყო აღებული.
გარდა ამისა, ლავროვმა განაცხადა, რომ აშშ-ის მოქმედებები აჩვენებს, რომ ვაშინგტონი უარს ამბობს შუამავლის „ობიექტურ როლზე“ რუსეთ-უკრაინის ომის მოგვარების პროცესში.
