აშშ-ის სახელმწიფო მდივანი მარკო რუბიო შესაძლოა, დონალდ ტრამპის ადმინისტრაციიდან წავიდეს და 2028 წლის საპრეზიდენტო არჩევნებისთვის მზადება დაიწყოს. ამის შესახებ ბრიტანული გამოცემა The Independent წერს.
გამოცემის ცნობით, რესპუბლიკური პარტიის წარმომადგენლები და ბრიტანეთის მთავრობის მაღალი რანგის წყაროები ვარაუდობენ, რომ რუბიო თანამდებობას დატოვებს, რათა რესპუბლიკური პარტიის საპრეზიდენტო კანდიდატობისთვის იბრძოლოს. ამ ეტაპზე მის მთავარ კონკურენტად ვიცე-პრეზიდენტი ჯეი დი ვენსი განიხილება.
The Independent-ის ინფორმაციით, რუბიოს ადმინისტრაციიდან წასვლის საკითხი აშშ-ის შუალედურ არჩევნებში რესპუბლიკელების მარცხის შემდეგ კიდევ უფრო აქტუალური გახდა. გამოცემის წყაროების თანახმად, რუბიო ერთ-ერთია ტრამპის ადმინისტრაციის ოთხი-ხუთი მაღალჩინოსნიდან, რომლებმაც შესაძლოა, თანამდებობები დატოვონ.
ერთ-ერთი წყაროს განცხადებით, რუბიომ შესაძლოა, ადმინისტრაციისგან დისტანცირება სცადოს, მათ შორის ირანის ომთან დაკავშირებული პოლიტიკური პასუხისმგებლობისგან გასამიჯნად.
გამოცემასთან საუბრისას რუბიოსთან დაახლოებულმა პირმა განაცხადა, რომ სახელმწიფო მდივნის თანამდებობის დატოვება საპრეზიდენტო არჩევნებში მონაწილეობის მსურველისთვის ლოგიკური ნაბიჯი იქნებოდა, რადგან ადმინისტრაციასთან კავშირი მის პოლიტიკურ პერსპექტივებს შესაძლოა, ხელს უშლიდეს.
The Independent-ის ცნობით, რუბიოს შესაძლო წასვლის შესახებ მოლოდინი რესპუბლიკელებს შორის შუალედურ არჩევნებამდეც არსებობდა და არჩევნების შედეგების შემდეგ კიდევ უფრო გაძლიერდა.
თეთრი სახლი და სახელმწიფო დეპარტამენტი ინფორმაციას უარყოფენ. თეთრი სახლის წარმომადგენელმა დევისი ინგლმა გამოცემის ინფორმაციას „უსაფუძვლო და ყალბი შეთქმულების თეორიები“ უწოდა. სახელმწიფო დეპარტამენტის წარმომადგენელმა დილან ჯონსონმა კი განაცხადა, რომ ინფორმაცია „სრულიად უსაფუძვლო ყალბი ამბავია, რომელიც გამოგონილ ანონიმურ წყაროებს ეყრდნობა“.
თავად რუბიოს თანამდებობიდან წასვლის ან საპრეზიდენტო არჩევნებში მონაწილეობის შესახებ ოფიციალური განცხადება არ გაუკეთებია. სექტემბერში მან განაცხადა, რომ ამ ეტაპზე საპრეზიდენტო არჩევნებში მონაწილეობას არ გეგმავდა და სრულად იყო კონცენტრირებული ადმინისტრაციაში დაკისრებულ მოვალეობებზე
