ევროკომისარი გაფართოების საკითხებში, მარტა კოსი, დარწმუნებულია, რომ ევროკავშირის გაფართოება მისი მანდატის პერიოდში განხორციელდება, თუმცა ახალი წევრი ქვეყნების ზუსტი რაოდენობა ჯერ განსაზღვრული არ არის.
ამის შესახებ მან გდანსკში გამართულ უკრაინის აღდგენის საკითხებზე საერთაშორისო კონფერენციაზე განაცხადა.
კოსის თქმით, მას შეუძლია დარწმუნებით თქვას, რომ მონტენეგრო ევროკავშირის შემდეგი წევრი გახდება მისი მანდატის დასრულებამდე, რომელიც 2029 წელს იწურება.
„შემიძლია ვთქვა, რომ მონტენეგრო ჩემი მანდატის პერიოდში ევროკავშირის წევრი გახდება. და თუ ისლანდია ევროკავშირში გაწევრიანების საკითხს დაუბრუნდება და მოქალაქეები ამას აგვისტოს რეფერენდუმზე მხარს დაუჭერენ, მოხარული ვიქნები“, - განაცხადა მან.
ევროკომისარმა ასევე ხაზი გაუსვა ალბანეთის სწრაფ პროგრესს.
„ალბანეთი უკვე იწყებს მოლაპარაკებების კლასტერების დახურვას. შესაბამისად, გაფართოების პროცესში ახლა უფრო მეტი წინსვლაა, ვიდრე ბოლო 15 წლის განმავლობაში ყოფილა“, - განაცხადა კოსმა.
ამასთან, მარტა კოსიმა მოუწოდა არ დაივიწყონ, რამ დააჩქარა ევროკავშირში გაწევრიანების შესახებ მიმდინარე მოლაპარაკებები.
„უნდა ვაღიაროთ, რომ ამ პროცესის დაჩქარების მთავარი მიზეზი სწორედ უკრაინაში ომის დაწყება გახდა“, - განაცხადა მან.
