თბილისში, იუდას ხე, იგივე არღავანი აყვავდა. ამ ხის ყვავილობა ძალიან ლამაზია და მას ხშირად საკურას ყვავილობასაც ადარებენ. არღავანის ხე მრავლად ხარობს თბილისის შემოგარენში - მთაწმინდის და კუს ტბის ფერდობებზე. ის გაზაფხულზე, ვნების კვირაში, ფოთლის გამოსვლამდე, მოწითალო და იასამნისფერი ყვავილებით იფარება.
გადმოცემის მიხედვით, მაცხოვარი იუდამ არღავანის ხის ძირას გასცა. იუდამ ფარისევლებს ქრისტეს ადგილსამყოფელი მიასწავლა და გასამრჯელოდ 30 ვერცხლი მიიღო. ეს ამბავი არღავანის ხემ რომ მოისმინა, სირცხვილისგან "გაწითლდა.." როცა იუდა საკუთარ საქციელს ჩაწვდა, თავი სწორედ,არღავანის ხეზე ჩამოიხრჩო. ის 30 ვერცხლი ქისიდან არღავანის ხის ძირში ჩამოეყარა. ამის შემდეგ,ამ ულამაზეს არღავანს იუდას ხე შეარქვეს და დღესაც ამ სახელით იხსენიებენ.
