დღეს, 25 იანვარს, აჭარის არ ჯანმრთელობისა და სოციალური დაცვის სამინისტროს, საზოგადოებრივი ჯანდაცვის ცენტრი და დასაქმების სააგენტო 2013 წლის მიზნობრივი პროგრამების და სამინისტროს 2012 წლის მუშაობის ანგარიშს ქობულეთის მუნიციპალიტეტის
გამგეობისა და საკრებულოის ჯანმრთელობისა და სოციალური დაცვის სამსახურების წარმომადგენლებს, თემის რწმუნებულებს, პირველადი ჯანდაცვის რგოლის ექიმებს და მუნიციპალიტეტში მოქმედ სამედიცინო დაწესებულებების თანამშრომლებს გააცნობს.
მუნიციპალიტეტში დაგეგმილ შეხვედრას აჭარის ჯანმრთელობისა და სოციალური დაცვის მინისტრი ნუგზარ სურმანიძე, მინისტრის მოადგილეები და სამინისტროს საქვეუწყებო დაწესებულების დირექტორები დაესწრებიან.
შეხვედრის მონაწილეებს მოსახლეობაში გასავრცელებლად პროგრამების შესახებ დამზადებული საინფორმაციო ბუკლეტები და პოსტერები დაურიგდებათ.
როგორც "ჯი-ეიჩ-ენს" სამინისტროდან აცნობეს, 2013 წელს უწყება 12 მიზნობრივ პროგრამას განახორციელებს. ესენია:1) დამატებითი სამედიცინო მომსახურების კომპონენტი, 2) გეგმიური ჰოსპიტალური მომსახურების კომპონენტი, 3) 100 წელს გადაცილებულ მოქალაქეებზე ერთჯერადი დახმარების კომპონენტი, 4) სოფლის მოსახლეობის ექიმამდელი სამედიცინო დახმარების კომპონენტი, 5) ბავშვთა ფსიქოსომატური აბილიტაციის (რეაბილიტაციის) კომპონენტი, 6) მოსახლეობისათვის განსაკუთრებულ შემთხვევებში სამედიცინო დახმარების კომპონენტი, 7) ონკოლოგიურ დაავადებათა მკურნალობის კომპონენტი, 8) რესურსტევადი, მაღალტექნოლოგიური (გულის ქირურგიის) სამედიცინო მომსახურების კომპონენტი, 9) შეზღუდული შესაძლებლობის მქონე და ხანდაზმულ პირთა გადაადგილების საშუალებებით სავარძელ-ეტლით უზრუნველყოფის კომპონენტი, 10) სმენადაქვეითებულ მოქალაქეთა სმენის აპარატებით უზრუნველყოფის კომპონენტი, 11) მაღალმთიან მუნიციპალიტეტებში სამედიცინო პერსონალის მატერიალური წახალისების კომპონენტი, 12) მიუსაფარ დედათა და ბავშვთა თავშესაფრით უზრუნველყოფის კომპონენტი.
სამინისტროს მიმდინარე წლის პროგრამული ბიუჯეტი 5 818 700 ლარს შეადგენს, აქედან 5 397 300 ლარი ჯანმრთელობის დაცვის პროგრამებზე, ხოლო 421 400 ლარი სოციალური დაცვის პროგრამებზე ნაწილდება.
სამინისტრო წელს პირველად ახორციელებს სმენადაქვეითებულ მოქალაქეთა სმენის აპარატებით უზრუნველყოფის, მიუსაფარ დედათა და ბავშვთა თავშესაფრით უზრუნველყოფის და მაღალმთიან მუნიციპალიტეტებში სამედიცინო პერსონალის მატერიალური წახალისების პროგრამას. რიგ პროგრამებში დაემატა დაავადებათა ჩამონათვალი, გაიზარდა მოსარგებლეთა რაოდენობა, ასევე შეიცვალა დაფინასების წესი, რაც პაციენტის მხრიდან თანაგადახდის შემცირებას ითვალისწინებს.
