უკრაინის პრეზიდენტის, ვოლოდიმირ ზელენსკის განცხადებით, მას შემდეგ, რაც უკრაინამ რუსეთის საჰაერო სივრცეში დრონების საფრთხის შესახებ გააფრთხილა, რამდენიმე ავიაკომპანიამ რუსული აეროპორტების მიმართულებით ფრენების შესრულებაზე უარი თქვა.
„ვიღებთ ინფორმაციას, რომ პირველმა ავიაკომპანიებმა რუსულ აეროპორტებში ფრენების შესრულებაზე უარი განაცხადეს მას შემდეგ, რაც ჩვენ რუსეთის ცაში დრონებისგან არსებული საფრთხის შესახებ გავაფრთხილეთ.
ეს სწორი და სრულიად ლოგიკური რეაქციაა არსებულ ფაქტებზე - ყველაფერზე, რაც ხდება პუტინის მიერ დაწყებული ომის გამო, რომლის დასრულებაც მას არ სურს. სიცოცხლე უნდა დავიცვათ“, - განაცხადა ზელენსკიმ.
მისი თქმით, უკრაინამ უკვე ოფიციალურად აცნობა საერთაშორისო ორგანიზაციებსა და პარტნიორებს რუსეთის საჰაერო სივრცეში არსებულ რეალურ ვითარებას.
ამასთან, რუსეთის ფედერაციის საჰაერო ტრანსპორტის ფედერალურმა სააგენტომ ავიაკომპანიებისთვის გაავრცელა შეტყობინება, რომლის თანახმადაც, უკრაინის მიერ რუსეთის საჰაერო სივრცესთან დაკავშირებით გამოქვეყნებულ დოკუმენტებს, რუსეთის მხარის მტკიცებით, იურიდიული ძალა არ აქვს.
შეგახსენებთ, ზელენსკიმ 1-ელ სექტემბერს განაცხადა, რომ რუსეთის საჰაერო სივრცე მთლიანად სახიფათო ხდება და ამის შესახებ გააფრთხილა ყველა ავიაკომპანია, რომელიც რუსეთის საჰაერო სივრცეს იყენებს.
ზელენსკის თქმით, უკრაინა სამოქალაქო ავიაციისთვის საფრთხეს არ წარმოადგენს და არც ერთი სამოქალაქო თვითმფრინავის დაზიანება არ სურს. თუმცა, მისი განცხადებით, რუსეთის ცაზე დრონები გადაადგილდებიან და ავიაკომპანიებმა ეს რისკი უნდა გაითვალისწინონ.
„დღეს გვსურს გავაფრთხილოთ ყველა ავიაკომპანია, რომელიც რუსეთის საჰაერო სივრცეს იყენებს, ყველა სადაზღვევო კომპანია და ყველა, ვინც ჯერ კიდევ სარგებლობს რუსეთის მთავარი აეროპორტებით: რუსეთის ცა მთლიანად სახიფათო ხდება“, - განაცხადა ზელენსკიმ.
