სერბეთში, გასულ წელს ანტისამთავრობო საპროტესტო აქციების დროს დაკავებული დემონსტრანტების მიმართ ძალის გადამეტებისა და წამების ბრალდებით ცხრა მოქმედი და ერთი ყოფილი პოლიციელი დააკავეს. ამის შესახებ Reuters სერბეთის შინაგან საქმეთა სამინისტროზე დაყრდნობით წერს.

უწყების ინფორმაციით, დაკავებულები პოლიციის ელიტურ დანაყოფში მსახურობდნენ. მათ ბრალად ედებათ 2025 წლის 14-15 აგვისტოს, ბელგრადის ცენტრში მდებარე მთავრობის შენობის ავტოფარეხში რამდენიმე პირის წამება და დაშინება.

სამინისტროს განცხადებით, ეჭვმიტანილებმა ძალისა და მუქარის გამოყენებით რამდენიმე ადამიანს ძლიერი ტკივილი და მძიმე ფიზიკური და ფსიქოლოგიური ტანჯვა მიაყენეს. უწყების ვერსიით, მათი მიზანი ინფორმაციის მოპოვება, დაკავებულების დაშინება და უკანონო დასჯა იყო.

Reuters-ის ცნობით, ეს პირველი მნიშვნელოვანი დაკავებებია სერბეთში საპროტესტო აქციების მონაწილეების მიმართ პოლიციის ძალადობის ფაქტებთან დაკავშირებით.

სერბეთში ანტიკორუფციული საპროტესტო გამოსვლები 2025 და 2026 წლებში მას შემდეგ დაიწყო და გაფართოვდა, რაც 2024 წლის 1 ნოემბერს ქალაქ ნოვი-სადში განახლებული რკინიგზის სადგურის ბეტონის კონსტრუქცია ჩამოინგრა და 16 ადამიანი დაიღუპა. დემონსტრანტები ხელისუფლებისგან პასუხისმგებლობის დაკისრებასა და კორუფციასთან ბრძოლას მოითხოვდნენ.