აშშ-ის პრეზიდენტმა დონალდ ტრამპმა მრჩევლებთან პიტ ჰეგსეთის თავდაცვის მდივნის თანამდებობაზე დარჩენის საკითხი გაბიხილა. ამის შესახებ CBS News-ი საკუთარ წყაროებზე დაყრდნობით წერს.
გამოცემის ინფორმაციით, ტრამპმა ეს საკითხი მრჩევლებთან როგორც პირადად შეხვედრებისას, ისე სატელეფონო საუბრების დროს განიხილა, მას შემდეგ, რაც კონგრესის შუალედურ არჩევნებში რესპუბლიკელებმა მარცხი განიცადეს.
წყაროების ცნობით, ტრამპს ჰეგსეთის თანამდებობიდან გათავისუფლების ან მისი შემცვლელის დანიშვნის შესახებ საბოლოო გადაწყვეტილება ჯერ არ მიუღია.
ჰეგსეთის შესაძლო შემცვლელებს შორის ტრამპი, ერთ-ერთი წყაროს ინფორმაციით, ფლორიდის რესპუბლიკელ გუბერნატორ რონ დესანტისსაც განიხილავს.
თეთრი სახლის პრესსპიკერმა ანა კელიმ, ჰეგსეთის მომავალთან დაკავშირებით გავრცელებული ინფორმაციის კომენტირებისას, განაცხადა, რომ ტრამპი თავდაცვის მდივანს „სრულად ენდობა“.
ამასთან, თეთრი სახლის ზოგიერთი წარმომადგენელი ვარაუდობს, რომ რესპუბლიკელების მარცხზე პასუხისმგებლობის ნაწილი შესაძლოა აშშ-ის ცენტრალური სარდლობის ხელმძღვანელს, ადმირალ ბრედ კუპერსა და გაერთიანებული შტაბების უფროსთა კომიტეტის თავმჯდომარეს, გენერალ დენ კეინს დაეკისროთ.
მათი შეფასებით, ორივე მათგანს მნიშვნელოვანი როლი ჰქონდა ირანთან ომის სტრატეგიის შემუშავებაში.
შეგახსენებთ, რომ აშშ-ის კონგრესის შუალედურ არჩევნებში პრეზიდენტ დონალდ ტრამპის რესპუბლიკურმა პარტიამ კონგრესის ორივე პალატაში უმრავლესობა დაკარგა.
ტრამპმა განაცხადა, რომ არჩევნების შედეგებს აღიარებს და კონგრესში დემოკრატიულ უმრავლესობასთან თანამშრომლობისთვის მზად არის.
