აშშ-ის სახელმწიფო მდივანმა მარკო რუბიომ განაცხადა, რომ შეერთებული შტატები უკრაინასთან Patriot-ის საჰაერო თავდაცვის სისტემებისთვის განკუთვნილი რაკეტების წარმოების ლიცენზიის გაცემის საკითხზე მოლაპარაკებებს აწარმოებს. ამის შესახებ მან The Brian Kilmeade Show-ს ეთერში ილაპარაკა. იუწყება უკრაინული მედია.
რუბიოს თქმით, ლიცენზიის მიღება უკრაინისთვის არსებული საჭიროებების დაუყოვნებლივ გადაწყვეტას ვერ უზრუნველყოფს, რადგან ასეთი რთული შეიარაღების წარმოების გაზრდა და შესაბამისი ქარხნების აშენება შესაძლოა რამდენიმე წელს მოითხოვდეს.
„ეს საკითხი ახლა განიხილება. როგორც უკვე ვთქვი, ეს დაუყოვნებელი გამოსავალი არ არის. წარმოების გაზრდა, ლიცენზიის არსებობის შემთხვევაშიც კი, რამდენიმე წელს მოითხოვს შესაბამისი ქარხნების ასაშენებლად. საუბარია უკიდურესად რთულ შეიარაღებაზე. ამიტომ ეს საკითხი ახლა განიხილება. შესაძლოა, ამან შედეგი გამოიღოს, მაგრამ რეალურად ეს ვერ გადაჭრის მოკლევადიან პრობლემას, რომელზეც ისინი საუბრობენ“, - განაცხადა აშშ-ის სახელმწიფო მდივანმა .
