მოსკოვის აეროპორტებმა - „ვნუკოვომ“ და „შერემეტიევომ", ზედიზედ მეორე ღამეს დროებით შეაჩერეს მუშაობა. ამის შესახებ გამოცემა The Moscow Times იუწყება.
შეზღუდვები უკრაინის პრეზიდენტ ვოლოდიმირ ზელენსკის გაფრთხილებებს მოჰყვა, რომლის თანახმად, რუსეთის საჰაერო სივრცე სამოქალაქო ავიაციისთვის სულ უფრო სახიფათო ხდება.
რუსეთის ფედერალური საჰაერო ტრანსპორტის სააგენტოს, „როსავიაციის“, განცხადებით, მოსკოვის რეგიონში თვითმფრინავების მიღებასა და გაშვებაზე დროებითი შეზღუდვები დაწესდა ფრენების უსაფრთხოების უზრუნველსაყოფად. მოგვიანებით შეზღუდვები მოიხსნა.
წინა ღამეს მოსკოვის სამ აეროპორტში მუშაობა იყო შეზღუდული. Flightradar24-ის მონაცემებით, „შერემეტიევოში“ 21 რეისი გაუქმდა, 235 კი დაგვიანდა, ხოლო „ვნუკოვოში“ 22 რეისი გაუქმდა და 94 დაგვიანდა.
შეგახსენებთ, ზელენსკიმ 1-ელ სექტემბერს განაცხადა, რომ რუსეთის საჰაერო სივრცე მთლიანად სახიფათო ხდება და ამის შესახებ გააფრთხილა ყველა ავიაკომპანია, რომელიც რუსეთის საჰაერო სივრცეს იყენებს.
ზელენსკის თქმით, უკრაინა სამოქალაქო ავიაციისთვის საფრთხეს არ წარმოადგენს და არც ერთი სამოქალაქო თვითმფრინავის დაზიანება არ სურს. თუმცა, მისი განცხადებით, რუსეთის ცაზე დრონები გადაადგილდებიან და ავიაკომპანიებმა ეს რისკი უნდა გაითვალისწინონ.
„დღეს გვსურს გავაფრთხილოთ ყველა ავიაკომპანია, რომელიც რუსეთის საჰაერო სივრცეს იყენებს, ყველა სადაზღვევო კომპანია და ყველა, ვინც ჯერ კიდევ სარგებლობს რუსეთის მთავარი აეროპორტებით: რუსეთის ცა მთლიანად სახიფათო ხდება“, - განაცხადა ზელენსკიმ.
