აშშ-ის პრეზიდენტმა დონალდ ტრამპმა განაცხადა, რომ რუსეთის პრეზიდენტ ვლადიმირ პუტინთან სამიტს მხოლოდ მაშინ გამართავს, როდესაც პუტინი მზად იქნება უკრაინის წინააღმდეგ ომის დასრულების შესახებ შეთანხმებას ხელი მოაწეროს.
ტრამპმა ამის შესახებ თეთრ სახლში ჟურნალისტებთან საუბრისას განაცხადა.
„ის [პუტინი] ამას, გააკეთებდა მე რომ მინდოდეს, მაგრამ მე შეხვედრის გამართვა მხოლოდ მაშიმ მინდა, როდესაც მზად ვიქნებით სამშვიდობო შეთანხმების დასადებად. მინდა, რომ კარგი ურთიერთობები გვქონდეს რუსეთთან, უკრაინასთან და ყველასთან. ეს ბიზნესისთვის შესანიშნავი იქნებოდა. რუსეთს უზარმაზარი ტერიტორია და ძალიან ღირებული მიწები აქვს. იქ ბევრი კარგი რამ ხდება. მაგრამ არა, ამ შეხვედრის გამართვა შეგვეძლო - დარწმუნებული ვარ, ამის გაკეთება დაუყოვნებლივ შემიძლია. მინდა, შეხვედრა მაშინ გავმართო, როდესაც ეს ომი დასასრულს მიუახლოვდება. და ვფიქრობ, ასეც იქნება“, - განაცხადა ტრამპმა.
თეთრი სახლის ლიდერმა უკრაინისა და რუსეთის პრეზიდენტებს საბრძოლო მოქმედებების შეწყვეტისკენ მოუწოდა.
„პუტინმა და ზელენსკიმ ეს სულელური ომი უნდა შეწყვიტონ“, - განაცხადა ტრამპმა.
ამასთან, აშშ-ის პრეზიდენტმა აღნიშნა, რომ მშვიდობის მიღწევას ორი ქვეყნის ლიდერებს შორის არსებული პირადი ურთიერთობები უშლის ხელს.
„იცით, მე რვა ომი შევაჩერე. რვა. ზოგიერთი მათგანი შესაჩერებლად ამ ომზე გაცილებით რთულად მიიჩნეოდა, მაგრამ მე მათი შეჩერება შევძელი. თუმცა უკრაინისა და რუსეთის პრეზიდენტებს შორის დიდი მტრობა არსებობს“ , - აღნიშნა ტრამპმა.
