ექიმი ვახტანგ კალოიანი "მთავარი არხის" გადაცემაში "ღამის მთავარი" ტვ პირველის ოპერატორ ლექსო ლაშქარავაზე საუბრისას ამბობს, რომ მის სისხლში აღმოჩენილი მედიკამენტები არაფრისმთქმელია, რადგან ლაშქარავა საავადმყოფოში იწვა და ტკივილის ინტენსიური გაყუჩება სჭირდებოდა.
"ის მედიკამენტები, რაც სისხლში აღმოჩნდა, არის ერთი ტკივილგამაყუჩებელი, ერთი არის მისი დეგრადაციის პროდუქტი, ერთი არის ფსიქოტროპული საშუალება, რომელიც ხშირად გამოიყენება ტკივილის მართვის შემთხვევაში, ანუ, თავისთავად, ამ მედიკამენტების არსებობა სისხლში, მით უმეტეს, პაციენტში, რომელიც რამდენიმე დღის წინ საავადმყოფოში იწვა და საკმაოდ ინტენსიურ ტკივილგაყუჩებას საჭიროებდა, არაფრისმთქმელია პროფესიული თვალსაზრისით.
ამ ჩამონათვლის მერე დასკვნის გაკეთება, რომ, სავარაუდოდ, ეს შეიძლება გამხდარიყო სიკვდილის მიზეზი, უბრალოდ არაპროფესიულია," - ამბობს კალოიანი.
შეგახსენებთ, გუშინ, შინაგან საქმეთა სამინისტროში გამართულ ბრიფინგზე განაცხადეს, რომ შუალედური ქიმიური ექსპერტიზის მიხედვით, ლექსო ლაშქარავას სისხლში აღმოჩნდა ნარკოტიკული ნივთიერება და შესაძლოა გარდაცვალების მიზეზი იყოს ზედოზირება.