აშშ-ის პრეზიდენტის, დონალდ ტრამპის ადმინისტრაცია რამდენიმე თვის განმავლობაში ემზადებოდა კონგრესში დემოკრატების შესაძლო გამარჯვებისთვის და გეგმავდა, როგორ გაეგრძელებინა თავისი პროგრამის ძირითადი მიმართულებების განხორციელება აღმასრულებელი ხელისუფლების მეშვეობით. ამის შესახებ Reuters თეთრი სახლის ერთ თანამშრომელსა და კიდევ ორ პირზე დაყრდნობით წერს, რომლებისთვისაც აღნიშნული გეგმები ცნობილია.
სააგენტოს წყაროების ცნობით, მაღალი თანამდებობის პირები, მათ შორის აშშ-ის პრეზიდენტის შიდა უსაფრთხოების საკითხებში მრჩეველი სტივენ მილერი და ადმინისტრაციულ-საბიუჯეტო მართვის ოფისის დირექტორი რასელ ვოუტი, აპრილიდან თანამშრომლობენ თეთრი სახლის იურიდიულ სამსახურთან. ისინი განსაზღვრავენ, რა ზომების მიღება შეუძლია ტრამპის ადმინისტრაციას კონგრესის თანხმობის გარეშე იმიგრაციის, ტარიფების, საცხოვრებლის ფასებისა და ფედერალური ხარჯების საკითხებზე.
წყაროების ინფორმაციით, თეთრი სახლის იურიდიული მრჩეველი უილ შარფი და მისი გუნდი ასევე სწავლობენ, რისი გაკეთება შეუძლია ტრამპს დამოუკიდებლად, მოქმედი კანონმდებლობის ფარგლებში, სად შეუძლია მას საკუთარი უფლებამოსილების ფარგლების გაფართოება და როგორ დაიცვას სასამართლოში მიღებული გადაწყვეტილებები.
სააგენტოს ცნობით, კონგრესზე კონტროლის მოპოვება დემოკრატებს ტრამპის წინააღმდეგ გამოძიებების დაწყების, კანონპროექტების დაბლოკვისა და მისი ხარჯვითი პრიორიტეტების შეზღუდვის შესაძლებლობას მისცემს. თუმცა, ტრამპს კვლავ ექნება აღმასრულებელი ხელისუფლების ფართო უფლებამოსილებები ვაჭრობის, საგარეო პოლიტიკისა და ფედერალური აპარატის მართვის სფეროებში.
ამასთან, რესპუბლიკელთა უმნიშვნელო უმრავლესობის შესაცვლელად დემოკრატებმა წარმომადგენელთა პალატასა და სენატში, შესაბამისად, ოთხი დამატებითი ადგილი უნდა მოიპოვონ. ამჟამად წარმომადგენელთა პალატაში რესპუბლიკელებს 218 ადგილი აქვთ, დემოკრატებს - 214, ხოლო სენატში რესპუბლიკელების წარმომადგენლობა 53-ს, დემოკრატებისა კი 47-ს შეადგენს.
ჟურნალისტების ცნობით, საზოგადოებრივი აზრის გამოკითხვების თანახმად, დემოკრატებს წარმომადგენელთა პალატაში გამარჯვების შანსი აქვთ, ხოლო სენატში საარჩევნო ვითარება კვლავ გაურკვეველია.
აშშ-ში შუალედური არჩევნები 3 ნოემბერს გაიმართება. ამ არჩევნებმა შესაძლოა, მნიშვნელოვნად შეცვალოს ძალთა ბალანსი კონგრესში და გავლენა იქონიოს დონალდ ტრამპის პრეზიდენტობის დარჩენილ ორ წელზე.
