გერმანიის პრეზიდენტის, ფრანკ-ვალტერ შტაინმაიერის განცხადებით, ჩინეთი არ არის დაინტერესებული აშშ-სა და რუსეთთან სამმხრივი სამიტის გამართვით, რომელზეც უკრაინაში ომის დასრულების გზებს განიხილავენ.
ამის შესახებ შტაინმაიერმა გერმანულ ტელევიზიასთან ინტერვიუში ისაუბრა. გამოცემა Yahoo-ს ცნობით, გერმანიის პრეზიდენტმა განმარტა, რომ ეს საკითხი ჩინეთის პრეზიდენტ სი ძინპინთან პეკინში გამართული შეხვედრის დროს განიხილა.
შტაინმაიერის თქმით, მიუხედავად იმისა, რომ აშშ-ის პრეზიდენტი დონალდ ტრამპი, რუსეთის პრეზიდენტი ვლადიმირ პუტინი და ჩინეთის ლიდერი სი ძინპინი, სავარაუდოდ, შენჟენში, აზია-წყნარი ოკეანის ეკონომიკური თანამშრომლობის (APEC) სამიტზე შეხვდებიან, ჩინეთის ლიდერის რეაქციამ აჩვენა, რომ უკრაინის საკითხი შეხვედრის დღის წესრიგში არ იქნება.
ფრანკ-ვალტერ შტაინმაიერის განცხადებით, უკრაინის საკითხზე აშშ-ის, რუსეთისა და ჩინეთის მონაწილეობით სამიტისთვის მზადება არ მიმდინარეობს.
„სი ძინპინმა პირდაპირ აღნიშნა, რომ ეს ევროპული კონფლიქტია, რომლის მოგვარებაშიც თავად ევროპელებმა უნდა მიიღონ მონაწილეობა“, - განაცხადა გერმანიის პრეზიდენტმა.
შტაინმაიერის თქმით, როდესაც მან ჩინეთის ლიდერთან ასეთი სამიტის გამართვის შესაძლებლობა განიხილა, სი ძინპინს გაკვირვება სახეზე დაეტყო.
ამრიგად, შტაინმაიერის განცხადებამ უარყო მედიაში გავრცელებული ცნობები უკრაინაში ომის დასრულების საკითხზე ჩინეთს, რუსეთსა და აშშ-ს შორის შესაძლო მოლაპარაკებების შესახებ.
