რუსეთის ნიჟნი-ნოვგოროდის ოლქში, კსტოვოს რაიონში მდებარე სამრეწველო საწარმო 1-ელი ნოემბრის ღამეს უკრაინული დრონებით თავდასხმის შედეგად მნიშვნელოვნად დაზიანდა. ამის შესახებ რეგიონის გუბერნატორმა გლებ ნიკიტინმა განაცხადა. ინფორმაციას "დოიჩე ველე" ავრცელებს.
მისი ინფორმაციით, თავდასხმის შედეგად წინასწარი მონაცემებით არავინ დაშავებულა. ხელისუფლება სამოქალაქო ინფრასტრუქტურისა და ქონებისთვის მიყენებულ ზარალს აფასებს.
ნიკიტინის განცხადებით, აღდგენითი სამუშაოების პერიოდში შესაძლოა საცხოვრებელ სახლებში ელექტროენერგიის დროებითი გათიშვა, ასევე ცხელი წყლისა და გათბობის მიწოდების შემცირება გახდეს საჭირო.
მისი თქმით, ოლქზე მასშტაბური დრონებით შეტევა მიმდინარეობდა და რეგიონში 100-ზე მეტი უპილოტო საფრენი აპარატი გაანადგურეს.
რუსული მედიისა და უკრაინული მონიტორინგის Telegram-არხების ცნობით, სამიზნე შესაძლოა ყოფილიყო ნავთობგადამამუშავებელი ქარხანა „ლუკოილ-ნიჟეგოროდნეფტეორგსინტეზი“, რომელიც რუსეთის ერთ-ერთი უდიდესი ნავთობგადამამუშავებელი საწარმოა. თავდასხმის შემდეგ ქარხნის ტერიტორიაზე ხანძრის შესახებ გავრცელდა ინფორმაცია.
უკრაინული მონიტორინგის Telegram-არხების, Exilenova+-ისა და Supernova+-ის ცნობით, თავდასხმის სამიზნე რუსეთის ერთ-ერთი უდიდესი ნავთობგადამამუშავებელი ქარხანა - „ლუკოილ-ნიჟეგოროდნეფტეორგსინტეზი“ იყო.
„ლუკოილ-ნიჟეგოროდნეფტეორგსინტეზი“ წელს დრონებით თავდასხმის სამიზნე არაერთხელ გამხდარა. აგვისტოში ქარხანამ მუშაობა რამდენიმე ტექნოლოგიური დანადგარისა და საერთო-საქარხნო ობიექტების დაზიანების გამო შეაჩერა. ამის შესახებ Reuters წერდა.
სააგენტოს ცნობით, სექტემბერში საწარმო ნომინალური სიმძლავრის მხოლოდ მეოთხედით მუშაობდა.
