ვიწყებთ საკანონმდებლო ცვლილებებს, რათა ქვეყნის არაეფექტური მართვისკენ მიმართული კანონები შეიცვალოს ისეთი ნორმებით, რომ ხალხის მიერ არჩეულ ხელისუფლებას ჰქონდეს ქვეყნის მართვისთვის შესატყვისი ბერკეტები და საშუალებები, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.
მდინარაძის თქმით, „ხშირ შემთხვევაში მხოლოდ ოთხი ასეული ადამიანისგან შემდგარი, უცხო ძალების ორგანიზებით კარგად გაწვრთნილი აგენტურული ბირთვი უხეშად არღვევს ოთხი მილიონი ადამიანის, ამ ქვეყნის მოქალაქეების უფლებებს და სწორედ ამ ანომალიის გამოსასწორებლად იწყებენ საკანონმდებლო ცვლილებებს“.
„მოგეხსენებათ, რომ დღეს საქართველოში კვლავ გრძელდება „დიფ სთეითის“ აგენტების მიერ ხელისუფლების ცვლილების მცდელობა. მართალია, მათ ამ ჯერზეც უსერიოზულესი კრახი განიცადეს, მაგრამ მაინც გვრჩება გამოწვევები. თავიანთი პატრონების დავალებით, ისინი კვლავ აგრძელებენ ქვეყნის ჯანჯღარს და, საბედნიეროდ, მიზანთან ახლოსაც არ არიან. ამის მიუხედავად, მათი ჯაშუშური საქმიანობის და შესაბამისი გარე დახმარების შედეგად ქვეყანას შედარებით მცირე, მაგრამ სხვა სახის პრობლემები ექმნება. მაგალითად, გასული წლის დეკემბერში, ნაცვლად 10%-იანი ეკონომიკური ზრდისა, ქვეყანას ჰქონდა 6,5%-იანი ეკონომიკური ზრდა, გაუარესდა ლარის კურსი და, შესაბამისად, ქვეყანამ და მისმა ეკონომიკამ გარკვეული დარტყმა მაინც მიიღო.
დღევანდელი მოცემულობით ეს უარყოფითი ტენდენცია ეკონომიკური მიმართულებით გასწორდა, მაგრამ სახელმწიფომ ყველაფერი უნდა გააკეთოს იმისათვის, რომ ქვეყნისა და ხალხის ინტერესების საბოტაჟი მოგონილი პროპაგანდისტური და მავნებლური არგუმენტებით „დიფ სთეითის აგენტურამ რაც შეიძლება ნაკლებად შეძლოს. უკიდურესად მნიშვნელოვანია, რომ ხელისუფლებამ ხალხისვე და სამშობლოს მსახურება მოახერხოს ხელოვნური დაბრკოლებების გარეშე. ხელოვნურ დაბრკოლებებში ვგულისხმობ წინა პერიოდებში, სხვადასხვა დროს ფსევდოლიბერალური იდეოლოგიის და გარე ძალების გავლენებით მიღებულ საკანონმდებლო ცვლილებებს, რაც პირდაპირ იყო მიმართული სახელმწიფოსა და მისი ინსტიტუტების ნგრევისა და დასუსტებისკენ. წლების განმავლობაში, დეტალების დონეზე, მიზანმიმართულად წარმოებდა ისეთი საკანონმდებლო ცვლილებების შეტანა კანონმდებლობაში, რომ სახელმწიფო და მისი მართვის ბერკეტები მაქსიმალურად ყოფილიყო დასუსტებული. დღეს ჩვენ, საბედნიეროდ, უკვე გვაქვს დამოუკიდებლობის ის ხარისხი, რომ შევძლოთ ასეთი მავნებლური ნორმების შეცვლა, რაც გააუმჯობესებს ხალხის მიერ არჩეული ხელისუფლების მიერ ქვეყნის მართვის ბერკეტებს და, მეორე მხრივ, გააიოლებს ინვესტიციების მოზიდვას, ეკონომიკის გაძლიერება/გაჯანსაღებას და ასევე დაიცავს პოლიციელებს, საჯარო მოხელეებს თუ ხელისუფლების სხვა წარმომადგენლებს ფსევდოლიბერალური ფაშიზმის, ბულინგის და მცირე აგენტურული ჯგუფების მიერ თავს მოხვეული ამაზრზენი თავდასხმებისგან. ჩვენ გვაქვს მოცემულობა დღეს, როდესაც ხშირ შემთხვევაში მხოლოდ ოთხი ასეული ადამიანისგან შემდგარი, უცხო ძალების ორგანიზებით კარგად გაწვრთნილი აგენტურული ბირთვი უხეშად არღვევს ოთხი მილიონი ადამიანის, ამ ქვეყნის მოქალაქეების უფლებებს. სწორედ ამ ანომალიის გამოსასწორებლად ვიწყებთ საკანონმდებლო ცვლილებებს, რომ ქვეყნის არაეფექტური მართვისკენ მიმართული კანონები შეიცვალოს ისეთი ნორმებით, რომ ხალხის მიერ არჩეულ ხელისუფლებას ჰქონდეს ქვეყნის მართვისთვის შესატყვისი ბერკეტები და საშუალებები“, – განაცხადა მამუკა მდინარაძემ.
მამუკა მდინარაძის განმარტებით, დღეს საუბრობს ამ მიდგომის რეალიზების პირველ ნაწილზე, რომელიც უკვე დაინიცირებულია საქართველოს პარლამენტში.
„პირობას ვაძლევთ საზოგადოებას, რომ ეს პროცესი გაგრძელდება იქამდე, ვიდრე სრულად არ შეიცვლება თავს მოხვეული ნორმები სახელმწიფოს გამართული ფუნქციონირებისა და დამოუკიდებლობისათვის აუცილებელი ნორმების მიღებით“, – განაცხადა მდინარაძემ.
რაც შეეხება კონკრეტულად ცვლილებებს, მამუკა მდინარაძემ აღნიშნა:
„მკაცრდება მთელი რიგი რეგულაციები, პირველ რიგში, ადმინისტრაციულ სამართალდარღვევათა კოდექსში, მათ შორის, მაგალითად, მესაკუთრის წინასწარი თანხმობის გარეშე იკრძალება დახურულ სივრცეში/შენობებში აქციების ჩატარება; წვრილმანი ხულიგნობისათვის, ვანდალიზმისათვის, სამართალდამცავი ორგანოს წარმომადგენლის მოთხოვნის დაუმორჩილებლობისა და მათი შეურცხყოფისათვის, სასამართლოს შესასვლელების ბლოკირებისათვის და სხვა მსგავსი, ბევრია ასეთი, ადმინისტრაციული კანონდარღვევისთვის ჯარიმები იზრდება და ასევე იზრდება ადმინისტრაციული პატიმრობის ვადაც 60 დღემდე.
ადმინისტრაციულ სამართალდარღვევად განისაზღვრება სახელმწიფო-პოლიტიკური თანამდებობის პირის, საჯარო მოსამსახურის სიტყვიერი შეურაცხყოფა მის საქმიანობასთან დაკავშირებით, რისთვისაც ასევე მკაცრი სანქციები განისაზღვრება. სისხლის სამართლის კოდექსშიც გვექნება მთელი რიგი ცვლილებები, რომლებიც განპირობებულია ფსევდოლიბერალების ფაშისტური ქმედებების პრეცენციის მიზნით, რასაც მრავლად ვხედავთ ამ ბოლო პერიოდის განმავლობაში.
კერძოდ: ძალადობრივი ქმედებებისკენ საჯაროდ მოწოდება აქამდე ისჯებოდა მხოლოდ ჯარიმით და საზოგადოებისათვის სასარგებლო შრომით. არსებული ცვლილებით, ამ ქმედებისათვის განისაზღვრება პატიმრობა, ეს არის უკვე სასჯელზე და არა სახდელზე საუბარი, პატიმრობა სამ წლამდე ვადით.
იზრდება სისხლისამართლებრივი პატიმრობის ვადა პოლიციელების მიმართ წინააღმდეგობის, მუქარის და ძალადობისთვის და ეს გადავა მძიმე დანაშაულთა კატეგორიაში, 5 წლიდან 6 წლამდე ამ კონკრეტულ შემთხვევაში. ასევე, მკაცრდება სანქცია პოლიციელზე, ხელისუფლების წარმომადგენელზე და მათი ოჯახის წევრებზე თავდასხმისათვის ჯგუფურობის, არაერთგზისობის, საშიში საშუალებით განხორციელების შემთხვევაში. ეს კონკრეტული გარემოებები გადავა დამამძიმებელ გარემოებებში და ამაზე იქნება, რა თქმა უნდა, შედარებით მკაცრი სანქცია, როგორც დამამძიმებელ გარემოებებზე.
სასჯელი იზრდება პოლიციელის ჯანმრთელობის ხელყოფის ფაქტზეც. ეს ახალი ნორმა იქნება, სისხლის სამართლის წესით დაისჯება პოლიტიკური თანამდებობის პირზე, სახელმწიფო მოსამსახურეზე, ასევე საჯარო მოსამსახურეზე თავდასხმის ან ძალადობის მუქარის ჩამდენი პირიც“.
მამუკა მდინარაძემ აღნიშნა, რომ ეს ცვლილებები „აგენტურას შეუზღუდავს სივრცეებს, რომ მათ საკუთარი ქვეყნის საბოტაჟი განახორციელონ“.
„ჩვენ გვექნება არაერთი ადმინისტრაციული სახდელი, მათ შორის გამკაცრების მიმართულებით და შეგიძლიათ, ეს პაკეტი დღეს უკვე დეტალურად იხილოთ. ძირითადი რაც იყო, როგორც ადმინისტრაციულში, ასევე სისხლის სამართლის კოდექსში ცვლილებები, ეს წარმოგიდგინეთ. კიდევ ერთხელ განვმარტავ, რომ ჩვენ ვერავის მივცემთ საშუალებას, წლების განმავლობაში დაგროვილი ძალიან ბევრი, გარედან ინსპირირებული, თავს მოხვეული ცვლილებების გამოყენება შეძლოს ვინმემ იმისათვის, რომ საქართველოს დამოუკიდებლობის ხარისხი შეზღუდოს, ხელისუფლებას არ ჰქონდეს ქვეყნის მართვის საშუალება პრაქტიკულად და ეს ფაშისტური გამოხტომები ისე იქნეს რეალიზებული, რომ ამაზე სახელმწიფოს პასუხი არ ჰქონდეს. ამაზე სახელმწიფოს ექნება მკაცრი პასუხი მხოლოდ და მხოლოდ ერთადერთი მიზნით, რომ ხალხის მიერ არჩეულ ხელისუფლებას უნდა ჰქონდეს რეალური ბერკეტი, მართოს ქვეყანა ისე, რომ გარე ძალებმა და მათმა აგენტურამ ვერ შეძლოს ვერც ეკონომიკის ზრდის გაუარესება და ათის მაგივრად, ექვსის და შვიდის უზრუნველყოფა. სამი და ოთხი პროცენტით ეკონომიკის უკან დაწევა არ არის პატარა საქმე. ამას გადავურჩებით, გავიტანთ, უკვე გასწორდა ეს პარამეტრები, მაგრამ რატომ? დეკემბერში რატომ არ უნდა ყოფილიყო ათი და რატომ უნდა გვიწევდეს ჩვენ შიგნით ბრძოლა აგენტურასთან, რატომ არ უნდა ვიბრძოდეთ ეკონომიკის კიდევ უფრო მეტი გაუმჯობესებისთვის და ამ საქმეებით რატომ უნდა ვიყოთ დაკავებული? ანუ, ჩვენ გვექნება ცვლილები, რომლებიც აგენტურას შეუზღუდავს სივრცეებს, რომ მათ საკუთარი ქვეყნის საბოტაჟი განახორციელონ“, – განაცხადა მამუკა მდინარაძემ.
