საზოგადოებრივი მაუწყებლის პირდაპირი ეთერის რეჟისორმა, კახა მელიქიძემ სამეურვეო საბჭოს სხდომაზე განაცხადა, რომ საქართველოს ეროვნული ნაკრების საფეხბურთო მატჩების პირდაპირი ტრანსლირების დროს ტელევიზიის ხელმძღვანელი პირები მას ირაკლი კობახიძის ეთერში რაც შეიძლება ხშირად ჩვენებას სთხოვდნენ, იუხედავად იმისა, რომ უეფა თავად არეგულირებს ტრიბუნების ჩვენების წესებს და თავად უეფას წარმომადგენლის მხრიდან იყო დაზუსტებული, კობახიძის ჩვენება პირდაპირ ეთერში ჰიმნის დროს ერთხელ იყო დაშვებული.
“დამირეკეს და მითხრეს, რომ რაც შეიძლება მეტი პრემიერის კადრი უნდა ვანახოთ ეთერშიო [ლუქსემბურგთან თამაშის დროს]. ვუთხარი, რომ ამას ვერ ვიზამდი, რადგან არსებობს უეფას წარმომადგენელი, რომელიც არეგულირებს ტრიბუნების ჩვენების წესებს და თავად უეფას წარმომადგენლის მხრიდან იყო დაზუსტებული, ქვეყნის მეთაურის პირდაპირ ეთერში ჰიმნის დროს ერთხელ იყო დაშვებული. ჰიმნის დროს ვანახეთ, მაგრამ იმის შემდეგ კვლავ ითხოვდნენ, მესიჯების საშუალებით.
ამის შემდეგ, რადგან მეთაურებზე იყო დაშვება, ერთი კადრი ვანახე პრეზიდენტის შემდეგ, დამიბარეს ტელევიზიაში, არ ვიტყვი, ვის კაბინეტში და ამიხსნეს, პრეზიდენტი რომ ვანახე ეთერში, არ იყო სწორი, რომ ეგ დავალება ჩემთვის არავის არ მოუცია და ეგ გადაწყვეტილება იყო არასწორი. შენ ხომ არ გგონია, რომ საზოგადოებრივ მაუწყებელზე ვართ ისევ. პარლამენტზე ვართ დამოკიდებული, დაფინანსება შეწყდება, პრობლემები შეგვექმნებაო”, - თქვა მელიქიძემ.
