აშშ-ის საერთაშორისო განვითარების სააგენტოს (USAID) ადმინისტრატორის მოვალეობას სახელმწიფო მდივანი მარკო რუბიო შეითავსებს. იტყობინება ტელეარხი ABC News-ი.

გავრცელებული ინფორმაცია, მალევე მარკო რუბიომაც დაადასტურა და შეშფოთება გამოხატა სააგენტოს საქმიანობასთან დაკავიშირებით.

რუბიოს განცხადებით, USAID-მა სახელმწიფო დეპარტამენტის პოლიტიკის დირექტივების შესაბამისად უნდა იმოქმედოს, რაზედაც უარს ამბობდა.

"USAID-ს მრავალი ფუნქცია აქვს, რომელიც გაგრძელდება და იქნება ამერიკის საგარეო პოლიტიკის ნაწილი და შესაბამისობაში მოდიოდეს ამერიკის საგარეო პოლიტიკასთან", - თქვა რუბიომ.

ცოტა ხნის წინ გავრცელდა ინფორმაცია, რომ აშშ-ის პრეზიდენტი დონალდ ტრამპი USAID-ის აშშ-ის სახელმწიფო დეპარტამენტის შემადგენლობაში გადატანას აპირებს. მიმდინარეობდა საუბრები USAID-ის დახურვასთან დაკავშირებითაც, რომელსაც ადვოკატირებას უწევდა ტრამპის უახლოესი მოკავშირე ილონ მასკი. მისი თქმით, USAID-ი კრიმინალური ორგანიზაციაა.

ტრამპის ადმინისტრაციამ გასულ შაბათ-კვირას USAID-ის უსაფრთხოების სამსახურის ორი მაღალი თანამდებობის პირი გაათავისუფლა მას შემდეგ, რაც ისინი შეეცადნენ მთავრობის ეფექტურობის დეპარტამენტის წარმომადგენლებისთვის შენობის გარკვეულ ნაწილებზე წვდომა შეეზღუდათ.

ტრამპმა ჟურნალისტებს 2 თებერვალს, განუცხადა, რომ სააგენტოს "რადიკალი გიჟები" მართავენ, მათ გაათავისუფლებენ და გადაწყვეტილებას ამის შემდეგ მიიღებენ.

USAID-ი, რომლის წლიური ბიუჯეტი თითქმის 43 მილიარდი დოლარია, პასუხისმგებელია უცხოეთის ქვეყნებისთვის აშშ-ის დახმარების მართვასა და განვითარების სფეროში თანამშრომლობაზე.

2025 წლის იანვარში დონალდ ტრამპმა USAID-ის პროგრამები 90 დღით შეაჩერა აშშ-ის საგარეო პოლიტიკურ კურსთან მათი შესაბამისობის დადგენამდე.