სახალხო დამცველმა აქციაზე დაკავებულები მოინახულა. მისი განცხადებით, 25 დაკავებულიდან 22 სამართალდამცავებისგან ფიზიკურ ძალადობაზე მიუთითებს, რაც საგანგაშოა.
ლევან იოსელიანმა თბილისის დროებითი მოთავსების იზოლატორის დატოვების შემდეგ მედიასთან განაცხადა, რომ პოლიციის მხრიდან ძალის გადამეტება ჩვეულ მოვლენად იქცა.
„სამწუხაროდ, ისევე, როგორც წინა აქციების დროს, პოლიციის მხრიდან ძალის გადამეტება ჩვეულ მოვლენად იქცა და ის ფაქტი, რომ 25 დაკავებულიდან 22 ფიზიკურ ძალადობაზე მიუთითებს, საგანგაშო სტატისტიკაა. ამასთან, ყურადსაღებია, რომ ადამიანები, რომლებმაც ჩაიდინეს კონკრეტული სავარაუდო დანაშაული, უნდა იყვნენ მიცემული პასუხისგებაში. დღემდე უამრავი მოქალაქე გვყავს დაზიანებული, მაგრამ არცერთი სამართალდამცავი არ არის მხილებული თავისი უფლებამოსილების გადამეტებასა და ძალადობაში. ამ საკითხზე უნდა გასცეს პასუხი სპეციალურმა საგამოძიებო სამსახურმა“, - განაცხადა ლევან იოსელიანმა.
