არქიტექტორი გიგა ბათიაშვილი მიიჩნევს, რომ გმირთა მოედანზე ესტაკადა დაუყოვნებლივ უნდა მოიშალოს.
მისი განმარტებით, ახალი გზა აუცილებლად ხიმინჯებზე უნდა მდგარიყო, გარდა ამისა, დაუშვებელია 3 კილომეტრის სიგრძის გზა ჩქაროსნული იყოს, საფრთხეს წარმოადგენს გვირაბიც, რომელიც შლად კლდეშია გაყვანილი.
„თბილისში კატასტროფული ვითარება გვაქვს. გვჭირდება გზები, მაგრამ საკითხავია როგორი გზები. ესტაკადა საერთოდ კატასტროფაა, ამით გვინდოდა მსოფლიოსთვის დაგვენახებინა, რომ ჩვენც მოწინავე ქვეყანა ვართ, მაგრამ მივიღეთ ტრაგედია. ესტაკადა უნდა მოიშალოს,“ - განაცხადა გიგა ბათიაშვილმა „კვირის“ პრესკლუბში.
იგი მიიჩნევს, რომ გმირათა მოედანზე ესტაკადის აგების ნაცვლად, მდინარე მტკვრის ორივე სანაპიროზე უნდა დაწესდეს ცალმხრივი მოძრაობა, ხოლო მათ დასაკავშირებლად დამატებითი ხიდები აშენდეს, მათ შორის უპირველესად პირველი ხიდი უნდა განთავსდეს სატივეზე - „ლაგუნა ვერეს“ პირდაპირ.
,,იმის გამო, რომ თბილისი იზრდებოდა, ვერეს ხეობაში ვაკე-საბურთალოსთან დამაკავშირებელი გზის გაყვანა, ჯერ კიდევ გასული საუკუნის 70-იან წლებში იყო მონიშნული” - აღნიშნა არქიტექტორმა.
