თბილისის მერიის ორგანიზებით, ისტორიის მუზეუმ "ქარვასლა"-ში თბილისის ისტორიული ცენტრის რეაბილიტაციის ამსახველი ფოტო-გამოფენა გაიხსნა. გამოფენა ორი კვირის განმავლობაში გაგრძელდება და დამთავარიელებელს შესაძლებლობა ექნება გაეცნოს ბოლო წლების განმავლობაში, თბილისის ისტორიული უბნების ძველი იერსახისა და რეაბილიტირებულ უბნებში მიმდინარე სამშენებლო პროცესის, განახლებული შენობების, ქუჩებისა და დასასვენებელი პარკების ამსახველ ფოტოებს. 2009 წლიდან დღემდე, თბილისის მერიის ინიციატივით, განახლდა კალა, აბანოთუბანი, ლეღვთახევი, დავით აღმაშენებლისა და რუსთაველის გამზირები, ზაარბრუკენის მოედანი, სამღებროს, საადის, ირგვლივის, ახვლედიანის, ბოტანიკურის, პუშკინის, უზნაძის, ტაბიძის, ჯორბენაძის, ცაბაძისა და მარჯანიშვილის ქუჩები. ასევე განახლდა რიყე, სადაც ქალაქის მნიშვნელოვანი რეკრეაციული ზონა - რიყის პარკი გაშენდა, ახალი სიცოცხლე შეიძინა ბოტანიკურმა და არტოს ბაღებმა, მოსწავლე ახალგაზრდობის სასახლის პარკმა, ხელოვნების ისტორიის ცენტრმა. პუშკინის ქუჩაზე აღმოჩენილ იქნა თბილისის ისტორიული გალავანი, რომელიც აღდგა და მას ისტორიული იერსახე შეუნარჩუნდა. რეაბილიტირებულ ქუჩებზე გამაგრდა ავარიული შენობების დეფორმირებული საძირკვლები, მოხდა დაბზარულ-დაზიანებული კედლების გაძლიერება, მოეწყო ანტისეისმური სარტყლები და დაზიანებული სახურავის კონსტრუქციები. საარქივო მასალების გათვალისწინებით, აღდგა და ავთენტურობა შეუნარჩუნდა შენობების გარე-ფასადებს.მნიშვნელოვანი სამუშაოები განხორციელდა მიწისქვეშა კომუნიკაციების რეაბილიტაციის მიზნით. გამოიცვალა წყალსადენი-კანალიზაციის ქსელები, მოეწყო უნიკალური სანიაღვრე სისტემები, გადაეწყო ელექტრომომარაგების, კავშირგაბმულობისა და გაზგაყვანილობის ქსელები.გზებზე მოეწყო ბუნებრივი ქვისა და ასფალტის საფარი, დამონტაჟდა თანამედროვე, ეკონომიური განათების სისტემები, დაირგო ხეები, ტერიტორიები გამწვანდა და მოეწყო ყვავილნარის კლუმბები. აღნიშნული სამუშაოების განხორციელებით, ასობით ოჯახის საცხოვრებელი პირობები გაუმჯობესდა, გაიხსნა ახალი კომერციული ობიექტები, შესაბამისად შეიქმნა სამუშაო ადგილები და თბილისი უფრო მიმზიდველი გახდა, როგორც თბილისელებისთვის, ისე დედაქალაქის სტუმრებისათვის.„ქარვასლაში" გახსნილი გამოფენა დღეს თბილისის მერმა გიგი უგულავამ დაათვალიერა.
მასალის გამოყენების პირობები