მარჯანიშვილების სახლ-მუზეუმი საქართველოს შოთა რუსთაველის თეატრისა და კინოს სახელმწიფო უნივერსიტეტის პირველკურსელების ფიცის დადების საიუბილეო, V ცერემონიას უმასპინძლებს. 2008 წელს კომპანია „რედიქსის" ინიციატივით აღდგენილი თეატრალური „ნათლობის" სიმბოლური რიტუალი შაბათს, 10 ნოემბერს, 14:00 საათზე, ყვარელში ჩატარდება.
80-იან წლებში, თეატრალურ ინსტიტუტში შექმნილი ფიცის დადების ლამაზი ცერემონია პირველ ხანებში თელავსა და ყვარელში, კოტე მარჯანიშვილის სახლის მარანში იმართებოდა. ამიტომაც გადაწყდა მივიწყებული ტრადიციის აღდგენა ყვარლის მუზეუმში, მარნის სცენაზე, სწორედ იმ ადგილას, სადაც კოტე მარჯანიშვილი თავის პირველ სპექტაკლებს დგამდა. ხანგრძლივი პაუზის შემდეგ უცვლელად შენარჩუნდა ხელახლა დაბადებული რიტუალის შინაარსი: დღესაც, ისევე, როგორც 30 წლის წინ, სტუდენტები ერთხმად დებენ ფიცს, რომ პასუხისმგებლობით მოეკიდებიან საკუთარ პროფესიას და ერთგულად ემსახურებიან სამშობლოს. ღონისძიების კულმინაცია გრიმის ცხების მომენტია, როდესაც ცნობილი და ყველასთვის საყვარელი არტისტები ახალბედა მსახიობებს სახეზე აცხებენ სასცენო გრიმს, როგორც გარდასახვის სიმბოლოს.
„ფიცის დადების რიტუალი ზუსტად 5 წლის წინ აღდგა და პირველმა მერცხლებმა, „მონათლულმა" სტუდენტებმა წელს უნივერსიტეტის დამთავრება აღნიშნეს. წრე შეიკრა: განახლებული რიტუალის მონაწილე პირველი თაობა უკვე დაადგა პროფესიული თეატრალური კარიერის ბილიკს. გაივლის წლები, ბევრი მათგანი მიაღწევს აღიარებას და მოიპოვებს მაყურებლის სიყვარულს... და ალბათ ყველას ყოველთვის განსაკუთრებულად გაახსენდება ცხოვრების ეს სასიამოვნო მომენტი - დღე, როდესაც შედგა მათი პირველი თეატრალური „ნათლობა". იმედია ღვაწლმოსილი მსახიობების მიერ გზის დალოცვა და გრიმის ცხება წარმატების მომტანი აღმოჩნდება თითოეული „მონათლული" სტუდენტისთვის", - აცხადებს კომპანია „რედიქსის" გენერალური დირექტორი ბატონი ლაშა პაპაშვილი.
