შოთა რუსთაველის დრამატული თეატრის დიდ სცენაზე წარმოდგენილი იქნება თანამედროვე ბალეტი "ალვა".
გიორგი ალექსიძის სახელობის ფონდმა და რუსთაველის დრამატულმა თეატრმა 2011 წელს საფუძველი ჩაუყარა თანამედროვე საბალეტო პროექტს "ფანტაზია ქართული ფოლკლორის თემაზე". საბალეტო სპექტაკლების ციკლი დაეყრდნობა საქართველოს სხვადასხვა კუთხის მითებს, ლეგენდებს, ადათ-წესებს, სარიტუალო ცეკვებსა და სიმღერებს, ხალხურ ან ლიტერატურულ ნაწარმოებებს. თანამედროვე საბალეტო ქორეოგრაფიული ხერხების საშუალებით ასახავს საქართველოს სხვადასხვა კუთხის დამახასიათებელ კულტურას, ისტორიულ ანარეკლს და ახლებური, განსხვავებული ელფერით იქნება წარმოდგენილი.
2011 წლის 11 ივნისს რუსთაველის თეატრის დიდ სცენაზე შედგა პრემიერა სპექტაკლისა "აჭარპანი"(რომელიც თბილისის მერიის თანადაფინანსებით დაიდგა) - პირველი თანამედროვე ბალეტი აფზახური ფოლკლორის თემაზე. იდეის ავტორი და დამდგემელი ქორეოგრაფი მარიამ ალექსიძე იყო. გამოყენებული იყო ეთნოგრაფიული ჩანაწერების უნიკალური ნიმუშები შესრულებული ტრადიციულ აფხაზურ საკრავებზე აჭარპანსა და აფხერცაზე და ქართველი კომპოზიტორების თეიმურაზ ბაკურაძის, იოსებ ბარდანაშვილის და ბერძენი კომპოზიტორის იანის ქსენაკისის თანამედროვე ნაწარმოებები. სცენოგრაფიულ გაფორმებას უხელმძღვანელა მხატვარ-სცენოგრაფმა გიორგი ალექსი-მესხიშვილმა. სპექტაკლში მონაწილეობდნენ მოწვეული წამყვანი სოლისტები - ნინო გოგუა, ბოსტონ ბალეტის პრემიერი - ლაშა ხოზაშვილი და სამსუნის ბალეტის პრემიერი დავით ხოზაშვილი.
პროექტის ფარგლებში მეორე დადგმა დაეთმობა სპექტაკლს, რომლის განხორციელების იდეაც ხევსურული ხმალას მთავარანგელოზის მირონმდინარე ალვისხის ცნობილ მითოსზე დაყრდნობით გაჩნდა. აღნიშნული დადგა, ისევე როგორც პირველი დაფინანსდა თბილისის მერიის კულტურული ღონისძიებების ცენტრის თანადაფინანსებით.
სპექტაკლი დადგმულია ი.ს. ბახის , გია ყანჩელის და არვო პიარტის მუსიკაზე. მუსიკალური გაფორმება ეკუთვნის თანამედროვე ქართველ კომპოზიტორს ეკა ჭაბაშვილს. სცენოგრაფიის და კოსტუმების მხატვარია გიორგი ალექსი-მესხიშვილი. სპექტაკლში მონაწილეობას იღებენ მოწვეული
წამყვანი მოცეკვავე ნაუელ-ალეჰანდრო ვეგა (არგენტინა) ნინო გოგუა და ეკატერინე სურმავა. ბალეტის სოლისტები: შორენა ხაინდრავა, დავით ანანიაშვილი, ნათია ბუნტური, ლანა მღებრიშვილი, ნატალია რიგვავა, სოფო ფანცულაია, ეკატერინე ლომინაძე, უილიამ პრატი და გაბრიელ გოგუა.
