2012 წლის 15-18 ოქტომბერს, ალბანეთში ევროპის საბჭოს კინოს განვითარების ფონდის „ევრიმაჟის" მმართველი საბჭოს 128-ე სხდომა გაიმართა. საბჭოს წევრებმა 18 კინოპროექტი დააფინანსეს, მათ შორის პირველი ქართულ-ესტონური კოპროდუქცია „მანდარინები" - რეჟისორი ზაზა ურუშაძე. ქართველი რეჟისორის პროექტის მხარდაჭერის გადაწყვეტილება იმ სამ პროექტს შორის იყო, რომლებიც წევრებმა ერთხმად მიიღეს.
ევრიმაჟის მმართველ საბჭოში საქართველოს წარმოადგენს ეროვნული კინოცენტრის დირექტორი - თამარ ტატიშვილი, რომელიც თავად წარადგენდა და იცავდა პროექტს.
ქართულ-ესტონურმა პროექტმა მიიღო 110 000 ევროს ოდენობის ფინანსური მხარდაჭერა. პროექტის წარმოება 2012 წლის დეკემბერში იგეგმება. პროექტს მოპოვებული აქვს ეროვნული კინოცენტრის სუბსიდიაც.
შეგახსენებთ, რომ საქართველო ევროპის საბჭოს კინოს განვითარების და მხარდაჭერის ფონდის - ევრიმაჟის წევრი ქვეყანა 2011 წელს გახდა. წელს „ევრიმაჟის" მხარდაჭერა საქართველოს თანამონაწილეობით სამმა პროექტმა მოიპოვა.
მასალის გამოყენების პირობები
