საქართველოს პარლამენტის ეროვნული ბიბლიოთეკის საგამოფენო დარბაზში გაიმართება რაულ ჩილაჩავას შემოქმედებითი საღამო. ასევე გამოიფინება მწერლის ეროვნული ბიბლიოთეკის ფონდებში დაცული გამოცემები.
რაულ ჩილაჩავა დაიბადა ზუგდიდის რაიონის სოფელ ჭითაწყარში. 1965-1970 წლებში იყო თბილისის სახელმწიფო უნივერსიტეტის ფილოლოგიის ფაკულტეტის ჟურნალისტიკის განყოფილების სტუდენტი. 1970 წელს დაამთავრა კიევის ტარას შევჩენკოს სახელობის სახელმწიფო უნივერსიტეტი და მას შემდეგ მოღვაწეობს კიევში.
რაულ ჩილაჩავა არის საქართველოსა და უკრაინის მწერალთა კავშირის წევრი და ლატვიის მეცნიერებათა აკადემიის საპატიო დოქტორი. ასევე გალაკტიონ ტაბიძის, მაქსიმ რილსკის, ვლადიმერ ვინიჩენკოსა და ალექსანდრე ჩაკის პრემიების ლაურეატი და ფრანც კაფკას სახელობის საერთაშორისო ოქროს მედლის მფლობელი. დაჯილდოებულია საქართველოს ღირსების ორდენითა და სხვადასხვა სახელმწიფო და საერთაშორისო ჯილდოებით. გამოცემული აქვს 90-ზე მეტი საკუთარი და ნათარგმნი წიგნი.
