საპარლამენტო უმრავლესობა კოლეგა ოპოზიციონერებს "აფრასიძეების" პერიოდის მონატრებაში ამხელს.
"ვიღაცას ძალიან აღიზიანებს რეფორმირებული პოლიცია, სასამართლო და ენატრება ალბათ ის დრო, როდესაც აფრასიძეები სვანეთში ბოგინობდნენ. დასავლეთ საქართველოში და პანკისში კრიმინალური ჯგუფები იყვნენ გაბატონებულები, აღმოსავლეთ საქართველოში კი ზოგიერთი რეგიონი ცენტრალური ხელისუფლების იურისდიქციიდან ფაქტიურად გასული იყო", - განაცხადა საპარლამენტო უმრავლესობის ლიდერმა პეტრე ცისკარიშვილმა დღევანდელი პლენარულ სხდომაზე ოპოზიციონერი დეპუტატების განცხადებებზე კომენტირებისას.
"როგორც ჩანს, ზოგიერთებს ის პერიოდი მოენატრათ, როდესაც ადამიანებს იტაცებდნენ და მხოლოდ ფულის გადახდის შემდეგ უშვებდნენ, როდესაც ციხეებიდან დამნაშავეები ფულით გამოდიოდნენ და ყველა თავისუფლებაზე იყო", - დასძინა უმრავლესობის ლიდერმა.
როგორც ცნობილია, დღევანდელ პლენარულ სხდომაზე ოპოზიციონერმა დეპუტატებმა ნიკა ლალიაშვილმა და დიმიტრი ლორთქიფანიძემ პოლიციაში და სასამართლო სისტემაში არსებულ "მძიმე ვითარებაზე" ისაუბრეს და აღნიშნეს, რომ ამ უწყებებში მდგომარეობა კატასტროფულია.
