დონალდ ტრამპის ადმინისტრაცია 43 ქვეყნის მოქალაქეებისთვის მკაცრი სამოგზაურო შეზღუდვების დაწესებას გეგმავს. სანქცირებულთა სიაში, შესაძლოა, მოხვდეს რუსეთი და ბელარუსი, ასევე ახლო აღმოსავლეთის, აფრიკისა და აზიის არაერთი ქვეყანა. ამის შესახებ The New York Times ოფიციალურ პირებზე დაყრედნპბით იუწყება.
გამოცემის წყაროების მიხედვით, ქვეყნები სია, რომელთა მოქალაქეები, შესაძლოა, დაექვემდებარონ შეზღუდვებს, აშშ-ის სახელმწიფო დეპარტამენტმა უსაფრთხოების სამსახურების წარმომადგენლებთან თანამშრომლობით შეიმუშავა.
სიის პროექტი ითვალისწინებს ქვეყნების სამ კატეგორიას: წითელი, ნარინჯისფერი და ყვითელი.
„წითელი“ სია მოიცავს 11 ქვეყანას, [ავღანეთი; ბუტანი; კუბა; ირანი; ლიბია; ჩრდილოეთ კორეა; სომალი; სუდანი; სირია; ვენესუელა; იემენი]
რომელთა მოქალაქეებს შეერთებულ შტატებში შესვლა სრულად აეკრძალებათ.
„ნარინჯისფერი“ სიაში შედის10 ქვეყანა, [რუსეთი; ბელარუსი; ერიტრეა; ჰაიტი; ლაოსი; მიანმარი; პაკისტანი; სიერა-ლეონე; სამხრეთ სუდანი; თურქმენეთი], რომლებისთვისაც მოგზაურობა მნიშვნელოვნად შეიზღუდება.
შეძლებულ ბიზნესმენებს შესაძლოა, მიეცეს შესვლის უფლება, მაგრამ ამ ქვეყნების მოქალაქეებისთვის საიმიგრაციო და ტურისტული ვიზები, შესაძლოა, დაიბლოკოს.
ამ სიაში მყოფი მოქალაქეები ასევე გაივლიან სავალდებულო პირად გასაუბრებას ვიზის მისაღებად.
„ყვითელ“ სიაში მყოფი 22 ქვეყნის [ანგოლა; ანტიგუა და ბარბუდა; ბენინი; ბურკინა ფასო; კამბოჯა; კამერუნი; კაბო-ვერდე; ჩადი; კონგოს რესპუბლიკა; კონგოს დემოკრატიული რესპუბლიკა; დომინიკა; ეკვატორული გვინეა; გამბია; ლიბერია; მალავი; მალი; მავრიტანია; სენტ-კიტსი და ნევისი; სენტ-ლუსია; სან-ტომე და პრინსიპი; ვანუატუ; ზიმბაბვე] მოქალაქეებს გამოვლენილი ხარვეზების გამოსასწორებლად 60 დღე ეძლევათ. უფრო მეტიც, მოთხოვნების შეუსრულებლობის შემთხვევაში რომელიმე სხვა სიაში გადაყვანა ემუქრებათ.
