იაშვილის სახელობის ბავშვთა ცენტრალური საავადმყოფოს სამედიცინო დირექტორის, ივანე ჩხაიძის განცხადებით, სტატისტიკის თანახმად, კორონავირუსით ყოველდღიურად 150-200 ბავშვი ინფიცირდება. ამის შესახებ ჩხაიძემ დღეს გამართულ პრესკონფერენციაზე განაცხადა.
ივანე ჩხაიძის განცხადებით, ინფიცირებულთა საერთო რაოდენობის 10% ბავშვია.
"მომდევნო დღეები და კვირა განსაკუთრებით მნიშვნელოვანი იქნება ბავშვების ჰოსპიტალიზაციისა და ლეტალობის თვალსაზრისით. თუ ჩვენ საქართველოს სტატისტიკას გავითვალისწინებთ, რომლის მიხედვითაც ქვეყანაში ინფიცირებულთა საერთო რაოდენობის 10% არის ბავშვი, გამოდის, რომ ყოველდღიურად ქვეყანაში 150-200 ბავშვი ინფიცირდება. ეს ძალიან მაღალი მაჩვენებელია", - თქვა ჩხაიძემ.
ივანე ჩხაიძე აღნიშნავს, რომ ბოლო დღეების განმავლობაში, სულ უფრო მეტი ბავშვი საჭიროებს ჰოსპიტალიზაციას.
როგორც ჩხაიძე აცხადებს, კორონავირუსის დელტა ვარიანტი ბავშვებისთვის განსაკუთრებით საშიშია.
"დღეს ისევ 2000-ზე მეტი ინფიცირებული გვყავს ქვეყანაში, ეს გაცილებით მეტია, ვიდრე წინა კვირების განმავლობაში, პრაქტიკულად გაორმაგებულია ივნისის ბოლო პერიოდთან შედარებით. დელტა ვარიანტი უფრო საშიშია ბავშვებისთვის, ამიტომ მათი დაცვის ერთადერთი შესაძლებლობაა ოჯახის უფროსი წევრების ვაქცინაცია.
მხოლოდ ორჯერადად ვაქცინირებული ადამიანები შეიძლება იყვნენ წყნარად. მათ ოჯახში, მათ შვილსა და შვილიშვილს ნამდვილად არ შეხვდება კორონავირუსის ინფექციის მაჩვენებელი",- თქვა ივანე ჩხაიძემ.