ველური ბუნების ეროვნული სააგენტო მუშაობს კანონზე „ნადირობისა და სანადირო სახეობათა მართვის შესახებ“, რომლის ამოქმედების შემდეგ, ქვეყნის მასშტაბით განხორციელდება მონადირეთა სერტიფიცირება, რაც ბრაკონიერობის შემცირებას შეუწყობს ხელს, აცხადებს გარემოს დაცვისა და სოფლის მეურნეობის მინისტრი, რომელმაც დღეს „გარემოს დაცვა და სოფლის განვითარება 2030“ - გრძელვადიანი ხედვა წარადგინა.
ღონისძიებას საქართველოს პრემიერ-მინისტრი ირაკლი ღარიბაშვილი საქართველოს პარლამენტის წევრები, საქართველოს მთავრობის ადმინისტრაციის, გარემოს დაცვისა და სოფლის მეურნეობის სამინისტროს წარმომადგენლები, სახელმწიფო რწმუნებულები, დიპლომატიური კორპუსის და საერთაშორისო, დონორი ორგანიზაციების, დარგობრივი ასოციაციების და სამეცნიერო წრეების წარმომადგენლები და ფერმერები ესწრებოდნენ.
ლევან დავითაშვილის თქმით, უწყება ფლორისა და ფაუნის, კავკასიის ენდემური და იშვიათი სახეობების გამრავლებისა და პოპულაციის აღდგენის მიმართულებით აქტიურ მუშაობას აგრძელებს. სააგენტოს სამომავლო გეგმაა, ფაუნის ენდემურ სახეობათა გენეტიკური კოდის დადგენა და მარკირების სისტემის შემოღება, რაც მონიტორინგის ერთ-ერთი შემადგენელი ნაწილია.
გარდა ამისა, სააგენტოში მდინარეების დათევზიანებისთვის მდინარის კალმახის ლიფსიტების წარმოება, წლიურ 1 მლნ ცალამდე გაიზრდება.
ასევე, ყოველწლიურად, 5 000 ფრთაზე მეტი კოლხური ხოხბის, კაკბის, გნოლისა და სხვა სახეობათა გამრავლება განხორციელდება ბუნებაში გაშვებისა და სამონადირეო მეურნეობებისთვის მიწოდებისთვის. სააგენტო, ველურ ბუნებაში აღდგენის მიზნით, წლიურად, ჭალის ტყისა და „წითელი ნუსხის“ არანაკლებ 200 000 ნერგს გამოიყვანს.
