პოლონეთის პრემიერ-მინისტრმა დონალდ ტუსკმა განაცხადა, რომ საკონსტიტუციო ტრიბუნალის გარშემო განვითარებულ მოვლენებთან დაკავშირებით გარკვეულ საკითხებზე კომპრომისი შეუძლებელია. ამის შესახებ მოსახლეობისადმი სატელევიზიო მიმართვისას ისაუბრა.
ტუსკის თქმით, „კანონისა და სამართლიანობის“ (PiS) ყოფილი მთავრობის მიერ ჩამოყალიბებული ტრიბუნალი ნამდვილ სასამართლოს არ წარმოადგენდა. პრემიერ-მინისტრმა აღნიშნა, რომ ამას საერთაშორისო ინსტიტუტები, პოლონეთის იურიდიული ორგანოები და საზოგადოებრივი აზრიც ადასტურებდნენ.
მისი მიმართვა ქვეყანაში საკონსტიტუციო ტრიბუნალის კონტროლისა და ახალი მოსამართლეების დანიშვნის საკითხზე გამწვავებულ დაპირისპირებას მოჰყვა. ტუსკის განცხადებით, პარლამენტმა ახალი მოსამართლეები აირჩია, მათ ფიცი დადეს, თუმცა პრეზიდენტმა კაროლ ნავროცკიმ ფიცის მიღებაზე უარი თქვა, ხოლო ტრიბუნალის თავმჯდომარემ, ბოგდან შვიეჩკოვსკიმ, მათ უფლებამოსილების განხორციელების საშუალება არ მისცა.
ტუსკმა ასევე გააკრიტიკა პრეზიდენტის შესვლა ტრიბუნალის შენობაში და განაცხადა, რომ არც ერთ პოლიტიკოსს, მათ შორის პრეზიდენტს, არ აქვს უფლება, სასამართლოში შევიდეს, მოსამართლეებს მითითებები მისცეს ან მათზე ზეწოლა მოახდინოს.
„საკონსტიტუციო ტრიბუნალსა და მის მოსამართლეებზე თავდასხმა კანონის უზენაესობის წინააღმდეგ ქმედებების მორიგი გამოვლინებაა, პროცესის, რომელსაც პარტია „კანონი და სამართლიანობა“, ასევე პრეზიდენტები – დუდა და ნავროცკი ახორციელებენ. საპარლამენტო უმრავლესობასთან ერთად, მე ვცადე ტრიბუნალის აღდგენა. ეჭვი არ მეპარებოდა, რომ ტრიბუნალი, პარტია „კანონი და სამართლიანობის“ მიერ დაწესებული ფორმით, ნამდვილი სასამართლო არ იყო. მინდა, ძალიან ნათლად გავუსვა ხაზი: ტრიბუნალის კანონიერად არჩეულ წევრებს თავს დაესხნენ და ადგილზე მყოფმა პოლიციამ ტრიბუნალი თავდამსხმელებისგან დაიცვა“, - განაცხადა დონალდ ტუსკმა.
ამასთან, ტუსკის თქმით, შემთხვევითი არ არის, რომ PiS-ის წევრები პრორუსულ ძალებში პოულობენ მხარდაჭერას.
„შემთხვევითი არ არის, რომ ისინი მხარდაჭერას მსოფლიოში პრორუსულ ძალებში პოულობენ და მიმდინარე კონფლიქტში მათ მხარს უჭერს ონლაინ რუსული ბოტების არმიაც კი. სინამდვილეში, საჯაროდ შექებაც კი მიიღეს კრემლის მთავარი იდეოლოგისგან“, - განაცხადა პოლონეთის პრემიერ-მინისტრმა.
პოლონეთის საკონსტიტუციო ტრიბუნალის გარშემო დაპირისპირება წლების განმავლობაში გრძელდება. 2015-2023 წლებში ქვეყნის მმართველი PiS-ის მიერ გატარებულმა სასამართლო რეფორმებმა სასამართლო სისტემის დამოუკიდებლობის შესახებ პოლონეთსა და ევროკავშირს შორის უთანხმოება გამოიწვია. ტუსკის მთავრობა აცხადებს, რომ სასამართლო სისტემაში კანონის უზენაესობა უნდა აღდგეს, ოპოზიცია კი ხელისუფლებას ტრიბუნალზე კონტროლის დამყარების მცდელობაში ადანაშაულებს
