შეერთებული შტატების ელჩი საქართველოში კელი დეგნანი იმედს გამოთქვამს, რომ თბილისში დაგეგმილი პრაიდის კვირეული მშვიდობიან ვითარებაში ჩაივლის.
"საქართველო ას წელზე მეტია იბრძვის ადამიანის უფლებებისთვის. გარკვეულ პირებს აშკარად სურთ ძალადობის გამოყენება, რათა ხელი შეუშალონ საქართველოს მოქალაქეების გამოხატვისა და შეკრების ძირითად თავისუფლებებას. ეს სერიოზულ პრობლემას ქმნის სამართალდამცავი ორგანოებისთვის, რომლებსაც ევალებათ საქართველოს მოქალაქეების მიერ შეკრებისა და გამოხატვის ძირითადი თავისუფლებებით სარგებლობის უზრუნველყოფა. ჩვენ, ყველას, იმედი გვაქვს, რომ ეს მოხდება მშვიდობიან გარემოში, ძალადობის გარეშე, რათა ამ პირებს ხელი არ შეეშალოთ ადამიანის უფლებების, მათი ძირითადი თავისუფლებების განხორციელებაში. სულ ეს არის", - განაცხადა ელჩმა დეგნანმა.
1-5 ივლისს "თბილისი პრაიდი" დედაქალაქში პრაიდის კვირეულის გამართვას გეგმავს. კვირეულის ფარგლებში იგეგმება დოკუმენტური ფილმის ჩვენება და ადგილობრივი და საერთაშორისო არტისტების მონაწილეობით ფესტივალის ჩატარება, ხოლო 5 ივლისს რუსთაველის გამზირზე, "ღირსების მარში" გაიმართება.
"ღირსების მარშის" მოწინააღმდეგენი აცხადებენ, რომ ყველაფერს გააკეთებენ ღონისძიების ჩასაშლელად.
გუშინ, ევროპარლამენტარებმა წერილობით მიმართეს შინაგან საქმეთა მინისტრ ვახტან გომელაურს და "ღირსების მარშის" დაცვისკენ მოუწოდეს.
