შეერთებული შტატების პრეზიდენტმა საძაგელი უწოდა თავისი ფრანგი კოლეგის ემანუელ მაკრონის განცხადებას ნატოს "ტვინის სიკვდილთან" დაკავშირებით.
დონალდ ტრამპი ლონდონში იმყოფება სამიტისთვის, სადაც ალიანსის 70 წლის იუბილეს აღნიშნავენ.
"ეს ძალიან, ძალიან საძაგელი განცხადებაა. ვფიქრობ, რომ საფრანგეთში უმუშევრობის ძალიან მაღალი დონე აქვთ. საფრანგეთი საერთოდ არ მუშაობს კარგად ეკონომიკურად”, - თქვა ტრამპმა პრესკონფერენციაზე.
ტრამპის თქმით, ნატო დიად მიზნებს ემსახურებოდა და მაკრონის განცხადება "უაღრესად შეყრაცხმყოფელი" იყო.
როგორც აშშ-ის პრეზიდენტმა აღნიშნა, საფრანგეთის პრეზიდენტმა ალიანსის სხვა ლიდერების მიმართ უპატივცემულობა გამოიჩინა.
სამიტის სადღესასწაულო განწყობა ერთგვარად დაჩრილა ალიანს წევრ ქვეყნებს საფრანგეთსა და თურქეთს შორის არსებულმა დაპირისპირებამ.
თურქეთის პრეზიდენტმა რეჯეპ ტაიპ ერდოღანმა განაცხადა, რომ იგი ეწინააღმდეგება ნატო-ს გეგმას ბალტიისპირეთს დასაცავად, თუ იგი მხარს არ დაუჭერს თურქეთს ქურთული ჯგუფების წინააღმდეგ ბრძოლაში, რომელსაც ერდოღანი ტერორისტულ ორგანიზაციად მიიჩნევს.
გავლენიან ბრიტანულ გამოცემა Economist-თან საუბრისას, ემანუელ მაკრონმა თქვა, რომ შეერთებულ შტატებსა და მის მოკავშირეებს შორის კოორდინაციის არარსებობის გამო, ნატო "ტვინის სიკვდილს" განიცდის.
მისივე თქმით, ევროპა ამჟამად დიდი განსაცდელის წინაშე დგას და მან უნდა დაიწყოს ფიქრი, როგორც გეოპოლიტიკურმა ძალამ, საკუთარი სტრატეგიული მომავლის შესახებ.
ამავე ინტერვიუში მაკრონმა მკაცრად გააკრიტიკა თურქეთი სირიაში წარმოებული სამხედრო ოპერაციის გამო.
ემანუელ მაკრონის გამოთქმულ კრიტიკას გამოეხმაურა თურქეთის პრეზიდენტი რეჯებ ტაიპ ერდოღანი.
"მე არ ვიცი რას ნიშნავს საფრანგეთი ნატოსთვის, მაგრამ თურქეთი არის ძალიან მნიშვნელოვანი ქვეყანა ნატოსთვის. ძვირფასო მაკრონ, უპირველესად უმჯობესია საკუთარი ტვინი შეაწმოთ, რადგან ასეთი განცხადებების კეთება ახასიათებთ მათ, ვისაც ტვინი მკვდარი აქვთ", - თქვა ერდოღანმა.
მაკრონის განცხადებას ნატოს "ტვინის სიკვდილთან" დაკავშირებით გაემიჯნენ გერმანიის კანცლერი ანგელა მერკელი და ალიანსის გენერალური მდივანი იენს სტოლტენბერგი.
ანგელა მერკელის თქმით, მიუხედავად იმისა, რომ პრობლემები არსებობს, ასეთი მკაცრი განცხადების გაკეთების აუცილებლობას ვერ ხედავს.
მოგვიანებით, ანგელა მერკელმა ბუნდესტაგის წინაშე სიტყვით გამოსვლისას განაცხადა, რომ ნატოს შენარჩუნება გერმანიის უმთავრესი ინტერესია.
"დღეს, გერმანიისთვის ნატოს შენარჩუნება უმთავრესი ინტერესია, უფრო მეტად ვიდრე ცივი ომის პირობებში. ჩვენ გავაგრძელებთ ალიანსისთვის მუშაობას და ამასთან დაკავშირებით კიდევ უფრო მეტ პასუხისმგებლობას ავიღებთ.
