საკონსტიტუციო სასამართლომ, რომლის სხდომაც ორი კვირის განმავლობაში მიმდინარეობდა, საქართველოს მოქალაქეებს ნათლად და მკაფიოდ დაანახა „ქართული ოცნების“ რეჟიმის სარჩელის აბსურდულობა, - ამის შესახებ „გახარია-საქართველოსთვის“ წევრმა თამარ კეკენაძემ განაცხადა,

მისი განცხადებით, დღემდე გაუგებარია, რას ედავება სარჩელით „ქართული ოცნება“ მათ პოლიტიკურ გუნდს.

„საკონსტიტუციო სასამართლომ, რომლის სხდომაც ორი კვირის განმავლობაში მიმდინარეობდა, საქართველოს მოქალაქეებს ნათლად და მკაფიოდ დაანახა „ქართული ოცნების“ რეჟიმის სარჩელის აბსურდულობა. ამის მარტივი და ნათელი გამოხატულება იყო, რომ გორდულაძე ყოველი დღის ბოლოს ცდილობდა, საკუთარი საძინებლის ოთახიდან საკუთარი ამომრჩევლისთვის აეხსნა, რას ედავება ქართულ ოპოზიციას. ჩვენთვის ჯერ კიდევ გაუგებარია, რას ედავება ის ჩვენს პარტიას.

სარჩელის მთავარი ამოცანაა პოლიტიკური ველიდან რეალურად დამოუკიდებელი ოპოზიციური ძალების განდევნა და ხელოვნური, ივანიშვილისთვის მისაღები პოლიტიკური ძალების შექმნა, რასაც ორი წლის განმავლობაში, ჯერ კიდევ მათი განცხადებებიდან მოყოლებული ყოველდღიურ რეჟიმში ვხედავდით. ვისმენდით, როგორ საუბრობდნენ ამაზე, როგორც პაპუაშვილი, ისე კობახიძე. რაც ყველაზე შემაშფოთებელია, მათ მიერ შექმნილი პარტიები, ვგულისხმობ „ნეიტრალურ საქართველოს“. ამის პარალელურად, ვხედავთ პროცესებს, როგორ იქმნება სხვა პარტიები, რომლებიც ასევე ცდილობენ, საქართველოს მოქალაქეებს წარმოუჩინონ, როგორც ახალი დამოუკიდებელი ძალები. ეს არის ორი წლის წინ დაანონსებული პროცესი. ეს პროცესი ბიძინა ივანიშვილმა ძალიან ღიად, დაუმალავად და მკაფიოდ დააფიქსირა 2024 წლის პერიოდში, თქვა, რომ მისთვის მნიშვნელოვანია, აიკრძალონ მიუღებელი პარტიები და პირველ რიგში, გულისხმობდა გიორგი გახარიას და პარტია „საქართველოსთვის“, შეიქმნას მის აღქმაში ჯანსაღი, კონკურენტუნარიანი პოლიტიკური ძალები. სწორედ ამ სცენარის განხორციელებას ვადევნებთ თვალყურს. ეს სარჩელი არის პოლიტიკური, სამართლებრივად დაუსაბუთებელი და თითოეული ოპოზიციური პარტია – და მე ვისაუბრებ ჩვენს პარტიაზე – ძალიან მწყობრად და ნათლად წარმოადგენდა იმ აბსურდულობას, რაც სარჩელში ვიხილეთ. „ქართული ოცნება“ ახლა ცდილობს, პროპაგანდისტული ხრიკებით შექმნას განცდა, თითქოს ოპოზიციას არ აქვს არგუმენტები. ეს არის უსუსური მცდელობა და ნათელი დადასტურება, რომ ვერ ახერხებენ, დაარწმუნონ მათ შორის საკუთარი ამომრჩეველი, რატომ უნდა აიკრძალოს ჩვენი პარტია“, – განაცხადა თამარ კეკენაძემ.