უკრაინის პრეზიდენტმა ვოლოდიმირ ზელენსკიმ განაცხადა, რომ უკრაინა მზად არის, აშშ-ის პრეზიდენტ დონალდ ტრამპის მოთხოვნის შესაბამისად, შეწყვიტოს რუსეთის ნავთობგადამამუშავებელ ქარხნებზე დარტყმები, თუმცა მხოლოდ იმ ვადით, რა პერიოდშიც შეერთებული შტატები უკრაინას თავდაცვისთვის საჭირო Patriot-ის რაკეტებით უზრუნველყოფს.
ამის შესახებ ზელენსკიმ Fox News-თან ინტერვიუში ისაუბრა. მისი თქმით, ამ საკითხზე აშშ-ის პრეზიდენტთან და მის თანაშემწეებთან რამდენიმე სხვადასხვა ფორმატის განხილვა გამართა.
„ჩვენ ვთქვით, რომ პასუხის გარეშე ვერ დავტოვებთ შემთხვევებს, როდესაც რუსეთი ჩვენს ენერგეტიკულ ინფრასტრუქტურას ესხმის თავს, კლავს ჩვენს ხალხს, ურტყამს ელექტროენერგეტიკის, გაზის სექტორისა და ნავთობგადამამუშავებელ ობიექტებს - ყველაფერს, რაც ჩვენს ენერგეტიკულ სისტემას უკავშირდება“, — განაცხადა ზელენსკიმ.
ზელენსკიმ ხაზგასმით აღნიშნა, რომ უკრაინა მზად არის, შეწყვიტოს რუსეთის ობიექტებზე თავდასხმები, თუ რუსეთიც შეწყვეტს უკრაინის ენერგეტიკულ სისტემაზე დარტყმებს.
„არის კიდევ ერთი ვარიანტი: მოგვაწოდეთ Patriot-ის რაკეტები. ჩვენ მოვძებნით ამისთვის საჭირო სახსრებს - ეს მხოლოდ დახმარების თხოვნა არ არის... მზად ვართ, მათში ფული გადავიხადოთ“,- განაცხადა მან.
ამასთან, ზელენსკის თქმით, უკრაინა თავდასხმებს მხოლოდ იმ ვადით შეაჩერებს, რა პერიოდითაც მას რაკეტებით უზრუნველყოფენ.
„თუ გინდათ, რომ ერთი თვის განმავლობაში რუსეთის ნავთობგადამამუშავებელ ქარხნებს არ დავარტყათ, ერთი თვის სამყოფი Patriot-ის რაკეტები მოგვაწოდეთ“, - აღნიშნა უკრაინის პრეზიდენტმა.
