საპარლამენტო კომიტეტებში მთავრობის სტრუქტურული რეორგანიზაციის შესახებ საკანონმდებლო პაკეტის განხილვა დაიწყო. ექვსმა კომიტეტმა დაჩქარებულ რეჟიმში დღეს კანონში შესატან ცვლილებებზე უნდა იმსჯელოს. თუმცა, განხილვა ხმაურის ფონზე მიმდინარეობს. "ევროპული საქართველოს" წევრ ზურაბ ჭიაბერაშვილსა და ადამიანის უფლებათა დაცვის კომიტეტის თავმჯდომარეს, სოფო კილაძეს, შორის მცირე შელაპარაკება მოხდა.
„ამხელა პაკეტი, რაც წარმოდგენილია, არის სახელწოდების ცვლილებები კანონებში და მეტი არაფერი. არანაირი კონკრეტული გეგმა, თუ როგორ უნდა შემცირდეს მთავრობის ზომა, მთავრობას არ წარმოუდგენია,“ - განაცხადა „ევროპული საქართველოს“ წევრმა, ზურაბ ჭიაბერაშვილმა. მის განცხადებას კი სოფო კილაძემ „სამარცხვინო“ უწოდა.
“სირცხვილია, თქვენ რომ საუბრობთ სიღარიბეზე, როდესაც თქვენი ხელისუფლების პირობებში ხმა არ ამოგიღიათ არც ერთ წარმომადგენელს. უდიდესი სირცხვილია თქვენგან ამის გაკეთება,“ - განაცხადა სოფო კილაძემ.
