უკრაინის პრეზიდენტის, ვოლოდიმირ ზელენსკის განცხადებით, ზაპოროჟიეს ოლქის დასახლება კომიშუვახაში სკოლის შენობაზე რუსეთის ავიადარტყმების შედეგად დაღუპულთა რაოდენობა 26-მდე გაიზარდა. ხუთი ადამიანი საავადმყოფოშია გადაყვანილი, ნანგრევების ქვეშ კი კვლავ რჩებიან ადამიანები.
ზელენსკის ცნობით, სკოლის შენობასა და მის თავშესაფარს ჰუმანიტარული საქმიანობისთვის იყენებდნენ. ყოველ ორშაბათს იქ ადგილობრივ მოსახლეობას დახმარებას ურიგებდნენ.
უკრაინის პრეზიდენტის განცხადებით, რუსულმა ძალებმა თავდაპირველად სკოლას რამდენიმე ავიაბომბით დაარტყეს, შემდეგ კი განმეორებითი დარტყმა თავშესაფარზე განახორციელეს.
„რუსეთის ამ დარტყმის შედეგად დაღუპულთა უმრავლესობა მშვიდობიანი მოქალაქეები არიან, რომლებიც ჰუმანიტარული დახმარების მისაღებად მივიდნენ, ასევე ისინი, ვინც პირველი დარტყმის შემდეგ მათ დასახმარებლად მივიდა“, - აღნიშნა ზელენსკიმ.
მისი თქმით, ოლეშკoში ჩატარებული ჰუმანიტარული ოპერაციის შემდეგ შესაძლებელი იყო ჰუმანიტარული ღონისძიებების გაგრძელება, რასაც უკრაინა თავადაც სთავაზობდა, თუმცა, როგორც ზელენსკიმ განაცხადა, „რუსეთი მკვლელობებს აგრძელებს“.
ადგილზე სამაშველო სამუშაოები კვლავ მიმდინარეობს.
