აშშ-ის პრეზიდენტის, დონალდ ტრამპის განცხადებით, 2026 წლის შუალედური არჩევნები ქვეყნის ისტორიაში ერთ-ერთი ყველაზე მნიშვნელოვანია.
„ჩემი აზრით, ჩვენი ცხოვრების განმავლობაში ეს ყველაზე მნიშვნელოვანი შუალედური არჩევნებია“, - განაცხადა ტრამპმა ვაშინგტონში, წინასაარჩევნო გამოსვლისას.
აშშ-ის პრეზიდენტმა დემოკრატიული პარტია გააკრიტიკა და განაცხადა, რომ პარტიამ კანდიდატების „ყველაზე ექსტრემალური და საშიში სია“ წარადგინა. ტრამპმა ამომრჩევლებს რესპუბლიკელების მხარდაჭერისკენ მოუწოდა და აღნიშნა, რომ კონგრესში დემოკრატების გამარჯვება მისი ადმინისტრაციის მიერ მიღწეულ შედეგებს საფრთხეს შეუქმნიდა.
„დემოკრატიულმა პარტიამ ამერიკის ისტორიაში ყველაზე ექსტრემისტული და საშიში კანდიდატები წარადგინა. ისინი ყველაზე საშიში კანდიდატები არიან, რაც კი ოდესმე წარუდგენიათ. ჯიჰადისტები და მუსლიმები. მათ რადიკალური დღის წესრიგი აქვთ: ღია საზღვრები, გადასახადების ტრილიონობით დოლარით გაზრდა, თქვენი იარაღის ჩამორთმევა, ბავშვების ტრანსგენდერული დასახიჩრება, ნავთობისა და ბუნებრივი გაზის გაუქმება და მთელი მსოფლიოდან მილიონობით მიგრანტისთვის კარის გაღება იმ იმედით, რომ ისინი ხმის მიცემას შეძლებენ. მხოლოდ ამიტომ უშვებენ მათ“, – აღნიშნა ტრამპმა.
ტრამპმა ასევე განაცხადა, რომ აშშ-ის მოქმედი პრეზიდენტის პარტია, როგორც წესი, შუალედურ არჩევნებში პოზიციებს კარგავს, თუმცა იმედი გამოთქვა, რომ ამჯერად ეს ტენდენცია შეიცვლება.
აშშ-ში შუალედური არჩევნები 3 ნოემბერს იმართება. ამომრჩევლები წარმომადგენელთა პალატის ყველა წევრსა და სენატის წევრთა ნაწილს აირჩევენ. არჩევნების შედეგები განსაზღვრავს, რომელი პარტია გააკონტროლებს კონგრესის ორივე პალატას ტრამპის პრეზიდენტობის დარჩენილი პერიოდის განმავლობაში.
