აჭარაში გამოვლენილი ჯილეხის შემთხვევების გამო სურსათის ეროვნულმა სააგენტომ ბათუმის აგრარულ ბაზარში არაგეგმური ინსპექტირება ჩაატარა. შემოწმების შედეგად გაირკვა, რომ ხორცისა და თევზის სექციაში არ ჰქონდათ დახლ-მაცივრები, რის გამოც დარღვეული იყო ტემპერატურული რეჟიმი, არ ტარდებოდა ხორცის ბაქტერიოლოგიური კვლევა, სექციისა და ინვენტარის რეცხვა-დეზინფექცია.
"სურსათის უვნებლობის, ვეტერინარიისა და მცენარეთა დაცვის სფეროებში ზედამხედველობის, მონიტორინგისა და სახელმწიფო კონტროლის განხორციელების წესის" მე-8 მუხლის თანახმად, სურსათის ეროვნულმა სააგენტომ ბათუმის აგრარულ ბაზარში ხორცისა და თევზის სექცია დახურა და შპს "ბი ჯი თრეიდს" კრიტიკული შეუსაბამობების აღმოფხვრამდე საწარმოო პროცესი შეუჩერა.
