ჩუღურეთის რაიონში "ნაციონალური მოძრაობის" პარლამენტის მაჟორიტარი დეპუტატობის კანდიდატი ანდრო ალავიძე დარწმუნებულია, რომ ჩუღურეთელები "ღირსეულ არჩევანს" გააკეთებენ.
მაჟორიტარი დეპუტატობის კანდიდატმა ხმა უკვე მისცა და როგორც "ჯი-ეიჩ-ენთან" საუბარში განაცხადა, არჩევანი "უკეთეს მომავალზე" გააკეთა.
"პირდაპირ ვიტყვი, ხმა მივეცი უკეთეს მომავალს და დარწმუნებული ვარ, ჩუღურეთის მოსახლეობა სწორ და ღირსეულ არჩევანს გააკეთებს. დღეს ისტორიული არჩევნები ტარდება, რადგან დედაქალაქი პირველად ირჩევს მერს პირდაპირი წესით", - განუცხადა ანდრო ალავიძემ "ჯი-ეიჩ-ენს".
რაც შეეხება მოსახლეობის აქტიურობას, პარლამენტის დეპუტატობის კანდიდატის განმარტებით, ჩუღურეთის მაცხოვრებლები საკმაო აქტიურობით გამოირჩევიან.
"როგორც წესი, ამომრჩეველთა აქტივობა საპრეზიდენტო და საპარლამენტო არჩევნებზე უფრო მაღალია, ვიდრე ადგილობრივი თვითმმართველი ერთეულის არჩევნებზე. თუმცა, ჩემდა გასაკვირად, დღეს ასე არ ხდება, რაც ალბათ, სწორედ იმითაა განპირობებული, რომ მათ მერის პირდაპირი წესით არჩევა უწევთ", - განმარტა მან.
ამასთან, ალავიძის შეფასებით, დღეს საერთაშორისო საზოგადოება დაინახავს, რომ "შეგვიძლია ღირსეული და დემოკრატიული არჩევნების ჩატარება".
