საქართველოს პრეზიდენტი მიხეილ სააკაშვილი მახინჯაურში რკინიგზის ახალი პროექტის პრეზენტაციას დაესწრო. პრეზიდენტმა ხალხს სიმბოლური ლიანდაგით ხელში მიმართა.
პრეზიდენტმა აღნიშნა, რომ ამ პროექტით ბათუმში მალე დამატებითი სამუშაო ადგილები გაჩნდება.
მიხეილ სააკაშვილის განცხადებით, მისი მთავარი ამოცანა სიღარიბის აღმოფხვრა და მოსახლეობის ასპროცენტიანი დასაქმებაა.
"ჩემი პრინციპია, ყველაფერი გავაკეთოთ იმისათვის, რომ უკეთესად ცხოვრობდეთ. თქვენ ამას იმსახურებთ. ბათუმი, უნდა გახდეს დიდი და ძალიან კომფორტული ქალაქი, სადაც ხალხი 100 პროცენტით იქნება დასაქმებული", - განაცხადა პრეზიდენტმა დადასძინა, რომ "სწორედ ამიტომ გვჭირდება ეს რკინიგზა, ავტობანი... ივლისში ვიწყებთ შემოვლითი გზის მშენებლობას ბათუმისკენ. გზის ეს პროექტი არა მარტო დაასაქმებს ძალიან ბევრ ადამიანს, არამედ საშუალებას მოგვცემს, რკინიგზა სანაპირო ზოლს მოვაშოროთ, ცოტა ზემოთ, მთაში გადავიტანოთ და უამრავი ადგილი გამოვათავისუფლოთ".
პეზიდენტის თქმით, ამით, ერთი მხრივ, ცენტრი განიტვირთება და, მეორე მხრივ, თბილისიდან ბათუმში ჩამოსვლა ძალზე გამარტივდება, რადგან ამ გზის გავლას მხოლოდ 2 საათი და 50 წუთი დასჭირდება.
ახალი პროექტით, სარკინიგზო ხაზი სანაპირო ზოლიდან მოშორებით გადავა და ის ბათუმს საშუალებას მისცემს რეგიონის ცენტრი გახდეს. გაიზრდება როგორც ტვირთბრუნვა, ისე მგზავრთა ნაკადი, რაც ტურიზმის განვითარების ერთ-ერთი აუცილებელი ფაქტორია. ახალი სარკინიგზო ხაზი საფრანგეთის რკინიგზასთან ერთად აშენდება და მის მშენებლობაზე 5 ათასი ადამიანი დასაქმდება.
მასალის გამოყენების პირობები
