საქართველოს საგარეო საქმეთა მინისტრი გრიგოლ ვაშაძე ყატარში ვიზიტის ფარგლებში დღეს ქვეყნის სახელმწიფო მეთაურს, ემირსა და საგარეო საქმეთა მინისტრს შეხვდება.
როგორც საგარეო უწყების ხელმძღვანელის მოადგილე ნინო კალანდაძემ დღეს გამართულ ტრადიციულ პრესკონფერენციაზე განაცხადა, საქართველოს დელეგაციის ვიზიტი, რომელიც ყატარში გუშინ დაიწყო, ძალიან საინტერესოდ მიმდინარეობს.
"რადგან როგორ ჩანს, ძალიან საინტერესო პროექტები დაიგეგმება ამ ვიზიტის ფარგლებში. იმდენად, რამდენადაც ჩვენთვის მნიშვნელოვანია აღმოსავლეთის არაბულ ქვეყნებთან ჩვენი დაახლოების პოლიტიკა, მნიშვნელოვნად ვაფასებთ ამ ვიზიტს. სავარაუდოდ, ჩვენ შესაძლებლობა მოგვეცემა, რომ სამართლებრივ ბაზაზე უფრო დეტალურად ვიმუშაოთ, გაფორმდეს რამდენიმე შეთანხმება", - განმარტა კალანდაძემ.
მისივე თქმით, გრიგოლ ვაშაძე და საგარეო უწყების დელეგაციის სხვა წარმომადგენლები უკვე შეხვდნენ ყატარის ბიზნესწრეების წარმომადგენლებს.
"ვინაიდან ჩვენი დაინტერესება მაღალია სწორედ ეკონომიკურ და საინვესტიციო პროექტებთან მიმართებაში (კერძოდ ენერგეტიკის სფეროში), გუშინ შეხვედრები ყატარის ბიზნესწრეების წამრომადგენლებთან გაიმართა, სადაც ძალიან საინტერესო პროექტებზე წარიმართა საუბარი და იმედი გვაქვს, რომ შედეგიც ასეთივე წარმატებული იქნება", - დასძინა საგარეო საქმეთა მინისტრის მოადგილემ.
შეგახსენებთ, რომ საქართველოს საგარეო უწყების დელეგაცია, რომელსაც გრიგოლ ვაშაძე ხელმძღვანელობს, ყატარს ორდღიანი ვიზიტით გუშინ ეწვია.
