საქართველოს პრეზიდენტი სალომე ზურაბიშვილი რუსთაველის გამზირზე, პარლამენტის წინ მიმდინარე საპროტესტო აქციაზე მივიდა.
პრეზიდენტის განცხადებით, დღევანდელი საღამო მშვიდად ჩაივლის და არ დაუშვებს არავითარ პროვოკაციას.
"ჭირშიც და ლხინშიც ერთად ვართ. აქ თუ რაღაცას ვზეიმობთ, ვიზეიმებთ და ყველაფერში ერთად ვართ და ყველა წყნარად იყოს, არაფერი მოხდება ამ საღამოს, ყველანი ერთად ვიქნებით", - განაცხადა მან ჟურნალისტებთან საუბრისას.
მოგვიანებით, პრეზიდენტმა მეგაფონით აქციის მონაწილეებს მიმართა. ის გამოეხმაურა თბილისის მერის გადაწყვეტილებას საახალწლო ნაძვის ხის ანთების ღონისძიების გადადების თაობაზე.
"არ იყოს აქ არანაირი პროვოკაცია. ნაძვის ხის ანთება ამ საღამოს აღარ იქნება. და თქვენ ყველანი ერთად იყავით მშვიდობიანად, იყავით კარგად და მე ვარ თქვენთან ერთად, იმიტომ რომ აქ არანაირ პროვოკაციას არ დავუშვებთ. მე ვარ თქვენთან, თქვენ ხართ ჩემს გულში", - მიმართა პრეზიდენტმა აქციის მონაწილეებს, რომელთაც, თავის მხრივ პრეზიდენტს მადლობა გადაუხადეს მხარდაჭერისთვის.
თბილისის მერი კახა კალაძე რუსთაველის გამზირზე ნაძვის ხის ანთებას დღეს, 14 დეკემბერს გეგმავდა. ცოტა ხნის წინ, გავრცელდა განცხადება ღონისძიების გადადებაზე.
