14 დეკემბერს, სამხრეთ კორეის პარლამენტმა, ქვეყნაში საომარი მდგომარეობის დაწესების გამო, მხარი დაუჭირა პრეზიდენტ იუნ სოკ იოლის იმპიჩმენტს.
საინფორმაციო სააგენტო Yonhap-ის ცნობით, პრეზიდენტის იმპიჩმენტის საკითხს მხარი 204-მა დეპუტატმა დაუჭირა, 85 კი წინააღმდეგი იყო. კიდევ სამმა პარლამენტარმა თავი შეიკავა, რვა ბიულეტენი კი ბათილად იქნა ცნობილი.
სააგენტო Reuters-ის ცნობით, ოპოზიციის ინიციატივას პრეზიდენტის იმპიჩმენტის შესახებ მხარი დაუჭირა მმართველი პარტია "სამოქალაქო ძალის" ზოგიერთმა წარმომადგენელმაც, რის წყალობითაც მიღწეულ იქნა საჭირო იმპიჩმენტისთვის საჭირო ხმების (ორი მესამედის) მობილიზება.
ახლა პრეზიდენტის მოვალეობები დროებით სამხრეთ კორეის პრემიერ მინისტრს ჰან დოკ-სუს დაეკისრება.
ეს იყო პრეზიდენტის იმპიჩმენტის მეორე მცდელობა. პირველად მისი გადაყენება 7 დეკემბერს სცადეს, თუმცა მაშინ "სამოქალაქო ძალის" დეპუტატებმა, რომლებიც პარლამენტში 108 მანდატს ფლობენ, კენჭისყრას ბოიკოტი გამოუცხადეს. შედეგად, იმპიჩმენტისთვის საჭირო რაოდენობის ხმები ვერ შეგროვდა.
შეგახსენებთ, 3 დეკემბერს პრეზიდენტმა იუნ სოკ იოლიმ, "ჩრდილოეთ კორეის მხარდამჭერი ძალების აღმოსაფხვრელად" და "კონსტიტუციური წესრიგის შესანარჩუნებლად", ქვეყანაში საომარი მდგომარეობა დააწესა. პარლამენტმა, ისევე როგორც მოსახლეობამ, მკაცრი წინააღმდეგობა გაუწია პრეზიდენტის მცდელობას საომარი მდგომარეობის დაწესების თაობაზე და მიაღწიეს კიდეც მის გაუქმებას. პრეზიდენტმა ბოდიში მოუხადა მოსახლეობას საომარი მდგომარეობის დაწესების გამო და პირობა დადო, რომ მსგავსი რამ არ განმეორდებოდა.
პრეზიდენტის თანამდებობიდან გადაყენების საკითხს საბოლოოდ საკონსტიტუციო სასამართლო გადაწყვეტს. თუ ის დაადგენს დანაშაულის ნიშნებს ამ გადაწყვეტილებაში, იუნ სოკ იოლი ვერ დაბრუნდება პრეზიდენტის თანამდებობაზე.
