ამერიკული ტელეკომპანია NBC News წყაროზე დაყრდნობით იუწყება, რომ აშშ-ის არჩეული პრეზიდენტის დონალდ ტრამპის გუნდს ჯერ არ წარუდგენია უკრაინისთვის რუსეთთან ომის დასრულების გეგმა, მაგრამ ამ საკითხზე აქტიურ კონსულტაციებს აწარმოებს როგორც კიევთან, ისე პრეზიდენტი ჯო ბაიდენის ადმინისტრაციასთაბ.
გამოცემა აღნიშნავს, რომ ტრამპის მრჩევლებს და მისი კაბინეტის მომავალ წევრებს კონფლიქტის მოგვარების მიდგომებთან დაკავშირებით განსხვავებული მოსაზრებები აქვთ.
თავად ტრამპი, რომელიც პირობას დებდა, რომ ომს თანამდებობის დაკავებიდან ერთ დღეში დაასრულებდა, დეტალებზე არ საუბრობს.
ბოლო დროს ჟურნალისტებთან საუბარში მან დაადასტურა, რომ უკვე აქტიურად მუშაობს ომის დასასრულებლად, მაგრამ მეტის თქმაზე უარი თქვა, რათა „მოლაპარაკებებს ხელი არ შეეშლოდა“.
მან ასევე არ უპასუხა შეკითხვას, ესაუბრა თუ არა რუსეთის პრეზიდენტ ვლადიმირ პუტინს ნოემბრის საპრეზიდენტო არჩევნებში გამარჯვების შემდეგ.
NBC News-ის ერთ-ერთი წყაროს თქმით, „ტრამპი ნამდვილად სერიოზულად არის განწყობილი პირველ დღეს ცეცხლის შეწყვეტის მიმართ“.
როგორც ავტორები თავიანთ წყაროებზე დაყრდნობით წერენ, ტრამპის გუნდს „ჯერ არ უცნობებია პრეზიდენტ ზელენსკის მთავრობისთვის რაიმე პოტენციური გეგმის შესახებ“.
„თუმცა, ზელენსკის, ტრამპსა და მათ მრჩევლებს შორის ბოლო შეხვედრები და საუბრები იყო კონსტრუქციული, მათ შორის მათი პირადი შეხვედრა პარიზში, რომელიც ორგანიზებული იყო საფრანგეთის პრეზიდენტის ემანუელ მაკრონის მიერ“, - ნათქვამია გამოცემაში.
ამავდროულად, ტრამპის გუნდი არ პასუხპვს შეკითხვას, შეეძლო თუ არა უნგრეთის პრემიერ-მინისტრს, ვიქტორ ორბანს, რომელიც პუტინთან დაახლოებული პირია, რაიმე გზავნილი გადაეცა არჩეულ ტრამპისთვის მარ-ა-ლაგოს რეზიდენციაში ვიზიტის დროს.
