"ქრისტიან-დემოკრატების" ლიდერი გიორგი თარგამაძე სინოდის განჩინებას ეხმინება და პატრიარქისა და მღვდელმთავრების კიდევ ერთი სახელმწიფოებრივად მნიშვნელოვანი გადაწყვეტილებისთვის მადლიერებას გამოხატავს.
"ქრისტიან-დემოკრატიულ მოძრაობას" მიაჩნია, რომ ცხუმ-აფხაზეთის ეპარქიის მმართველობის სრულიად საქართველოს კათოლიკოს-პატრიარქის ილია II-სათვის გადაცემის თაობაზე წმიდა სინოდის ისტორიულ გადაწყვეტილებას განსაკუთრებული პოლიტიკური და კულტურული მნიშვნელობა ენიჭება.
"ეს გადაწყვეტილება მთელი ქრისტიანული სამყაროსათვის და განსაკუთრებით ჩვენი მართლმადიდებელი მეზობლისთვის უნდა გახდეს მკაფიო სიგნალი იმისა, რომ ქართული ეკლესიისათვის აფხაზეთის ოკუპირებულ ტერიტორიაზე არსებული მდგომარეობა უაღრესად მნიშვნელოვანი საკითხია. საქართველოს მართლმადიდებელი ეკლესიის კანონიკური საზღვრების ამ ფორმით დაკონკრეტება კიდევ ერთხელ უსვამს ხაზს იმ ფაქტს, რომ აფხაზეთი იმყოფება სრულიად საქართველოს კათოლიკოს-პატრიარქის პირადი პატრონაჟის ქვეშ და ეს ანგარიშგასაწევი უნდა იყოს რუსეთის მართლმადიებელი ეკლესიისათვისაც, რომელიც აღიარებს აფხაზეთს საქართველოს მართლმადიდებელი ეკლესიის კანონიკური ტერიტორიის ნაწილად. იმედი მაქვს, რომ ამ გადაწყვეტილებით წერტილი დაესმება როგორც ე.წ. "აფხაზეთის დამოუკიდებელი ეკლესიის" აღიარების თემას, ასევე ოკუპირებულ ტერიტორიებზე ქართული ტაძრებისა და კულტურული მემკვიდრეობის მიმართ ვანდალიზმის გამოვლინების ფაქტებს" , - განაცხადა ქდმ-ს ლიდერმა გიორგი თარგამაძემ.
