უკრაინულმა დარტყმებმა რუსეთის ნავთობგადამამუშავებელი შესაძლებლობების 30%-ით შემცირება გამოიწვია. ამის შესახებ საინფორმაციო სააგენტო Reuters ორ წყაროზე დაყრდნობით წერს.
სააგენტოს ცნობით, უკრაინამ რუსეთის ნავთობგადამამუშავებელ ობიექტებზე დარტყმები ოქტომბრის ბოლოდან გააძლიერა. გასული კვირის განმავლობაში თავდასხმების შედეგად რუსეთის 35 უმსხვილესი ნავთობგადამამუშავებელი ქარხნიდან ცხრის მუშაობა შეფერხდა ან საგანგებო ვითარება შეიქმნა.
წყაროების ინფორმაციით, ოქტომბრის ბოლოდან დრონებით დაზიანებული ან შეფერხებული ქარხნების საერთო ნომინალური გადამამუშავებელი სიმძლავრე დღეში დაახლოებით 300 000 ტონა ნავთობს შეადგენს, რაც დაახლოებით 2.2 მილიონ ბარელს უტოლდება. რუსეთის ნავთობის პირველადი გადამუშავების საერთო სიმძლავრე კი დღეში დაახლოებით 930 000 ტონაა.
Reuters-ის წყაროების შეფასებით, რუსეთში ნავთობის ფაქტობრივი გადამუშავების მოცულობა შესაძლოა დღეში 200 000 ტონით შემცირებულიყო. ოქტომბრის ბოლოს რუსეთის ნავთობგადამამუშავებელი ქარხნები დღეში დაახლოებით 700 000 ტონა ნედლ ნავთობს, ანუ 5 მილიონ ბარელს ამუშავებდნენ.
დარტყმების შედეგად დაზიანებულ ობიექტებს შორისაა რიაზანისა და იაროსლავლის ნავთობგადამამუშავებელი ქარხნები, ასევე ვოლგისპირეთის რეგიონში მდებარე საწარმოები.
გარდა ამისა, ორშაბათს უკრაინული დრონი ლენინგრადის ოლქში მდებარე კირიშის ნავთობგადამამუშავებელ ქარხანას დაესხა თავს, რომელიც რუსეთის სიდიდით მეორე ასეთი საწარმოა. რეგიონის გუბერნატორის ცნობით, თავდასხმას ქარხანაში ხანძარი მოჰყვა, დაიღუპა ერთი ქალი.
სააგენტოს შეფასებით, უკრაინული დარტყმები მოსკოვს შიდა ბაზარზე საწვავის დეფიციტის აღმოფხვრას ურთულებს. ამასთან, რუსეთი აშშ-ის პრეზიდენტ დონალდ ტრამპთან მიღწეული საექსპორტო შეთანხმების ფარგლებში საერთაშორისო ბაზრებზე დიზელის საწვავის მიწოდებას აგრძელებს.
უკრაინამ რუსეთის ენერგეტიკულ ობიექტებზე დარტყმები მას შემდეგ გააძლიერა, რაც კიევსა და მოსკოვს შორის ენერგეტიკულ ინფრასტრუქტურაზე თავდასხმების შეჩერების შესახებ დონალდ ტრამპის მიერ გამოცხადებული შეთანხმება ვერ ამოქმედდა.
უკრაინის პრეზიდენტმა ვოლოდიმირ ზელენსკიმ გასულ კვირას განაცხადა, რომ კიევი რუსეთის ობიექტებზე დარტყმებს გააგრძელებს, რადგან რუსეთი კვლავ განაგრძობს უკრაინის ელექტროსადგურებზე, ენერგოქსელებზე, გათბობის სისტემებსა და წყალმომარაგების ობიექტებზე თავდასხმებს.
