დანია უკრაინისთვის 4.8 მილიარდი დანიური კრონის (დაახლოებით 643 მილიონი ევრო) ღირებულების სამხედრო დახმარების ახალ პაკეტს გამოყოფს. ამის შესახებ დანიის საგარეო საქმეთა მინისტრმა, ლარს ლოკე რასმუსენმა განაცხადა.
მისი თქმით, ეს უკრაინისთვის დანიის მიერ გამოყოფილი სამხედრო დახმარების 32-ე პაკეტია. რასმუსენმა ამის შესახებ საგარეო პოლიტიკის საპარლამენტო კომიტეტთან შეხვედრის შემდეგ ისაუბრა.
„დღეს კომიტეტთან ერთად განვიხილეთ უკრაინის დახმარების 32-ე პაკეტი, რომლის ღირებულებაც სამხედრო აღჭურვილობის სახით 4.8 მილიარდ კრონს შეადგენს“, - განაცხადა დანიის საგარეო საქმეთა მინისტრმა.
მნიშვნელოვანია, რომ ახალი დახმარების შესახებ განცხადება უკრაინის პრეზიდენტ ვოლოდიმირ ზელენსკის კოპენჰაგენში ვიზიტის პარალელურად გაკეთდა. რასმუსენის განცხადებით, დანიას სურს, უკრაინას პრაქტიკული ნაბიჯებით აჩვენოს, რომ მას დანიის მხარდაჭერის იმედი კვლავ უნდა ჰქონდეს.
გარდა სამხედრო დახმარებისა, დანია უკრაინის ენერგეტიკული სექტორის მხარდასაჭერად დამატებით 150 მილიონ დანიურ კრონს (დაახლოებით 20 მილიონ ევროს) გამოყოფს. ამის შესახებ ინფორმაციას ტელეკომპანია DR ავრცელებს.
რასმუსენმა ასევე აღნიშნა, რომ უკრაინისთვის მნიშვნელოვანი სამხედრო დახმარების გაგრძელებაა, რათა ქვეყანას საკუთარი პოზიციების დაცვისა და გაძლიერების მაქსიმალური შესაძლებლობა ჰქონდეს.
დანიის მიერ დახმარების ახალი პაკეტის გამოცხადება ზელენსკის კოპენჰაგენში ვიზიტს დაემთხვა. უკრაინის პრეზიდენტი დანიის პრემიერ-მინისტრ მეტე ფრედერიკსენს, ქვეყნის მთავრობის წარმომადგენლებსა და ჩრდილოეთ ევროპის ქვეყნების ლიდერებს ხვდება.
