უკრაინის პრეზიდენტმა ვოლოდიმირ ზელენსკიმ განაცხადა, რომ ევროპული დახმარების შეწყვეტამ შესაძლოა რუსეთის მხრიდან მასშტაბური ჰიბრიდული თავდასხმები ან ევროპის ქვეყნების წინააღმდეგ შემდგომი აგრესია გამოიწვიოს.
ამის შესახებ ზელენსკიმ დანიურ მედიასაშუალება DR Nyheder-თან ინტერვიუში ისაუბრა.
„თუ ევროპული დახმარება შეწყდება, შედეგები შეიძლება მხოლოდ სახიფათო ან ძალიან სახიფათო იყოს“, - განაცხადა უკრაინის პრეზიდენტმა.
ზელენსკიმ პირველ, შედარებით „რბილ“ სცენარად რუსეთის მხრიდან ჰიბრიდული თავდასხმების გააქტიურება დაასახელა. მისი თქმით, რუსეთს მსგავსი მოქმედებები უკვე განუხორციელებია მოლდოვაში, რუმინეთში, ბულგარეთში, გერმანიაში, ფინეთსა და დანიაში, ხოლო უკრაინის მხარდაჭერის შეწყვეტის შემთხვევაში ამგვარი ქმედებები მასშტაბურ ხასიათს მიიღებს.
ზელენსკის თქმით, მეორე სცენარი რუსეთის მიერ ევროპაში შემდგომ წინსვლას გულისხმობს. მისი შეფასებით, რუსეთის პრეზიდენტი ვლადიმირ პუტინი ყოფილი საბჭოთა კავშირის ქვეყნების, მათ შორის ბალტიისპირეთის სახელმწიფოებისა და მოლდოვის მიმართ გავლენის აღდგენას ცდილობს.
„ეს ნიშნავს, რომ საუბარია ნატო-ს წევრ ქვეყნებზეც, რაც იმას ნიშნავს, რომ ნატო-ს რეაგირება მოუწევს. ამ პროცესში მთელი ევროპა და შეერთებული შტატები ჩაერთვებიან. არსებობს საფრთხეები ზღვაზეც. რუსეთმა შესაძლოა ბალტიის ზღვა ისევე დაბლოკოს, როგორც შავ ზღვას ბლოკავს“, - განაცხადა ზელენსკიმ.
უკრაინის პრეზიდენტმა ხაზგასმით აღნიშნა, რომ ძლიერი უკრაინა ევროპის ქვეყნებისთვის აუცილებელია, რადგან, მისი თქმით, რუსეთი ევროპულ წესებსა და ღირებულებებს უპირისპირდება. ზელენსკის შეფასებით, უკრაინის დახმარების მიმართ სკეპტიკური დამოკიდებულება არცერთი ევროპული ქვეყნის ინტერესებში არ შედის.
