უკრაინის პრეზიდენტმა ვოლოდიმირ ზელენსკიმ განაცხადა, რომ აბუ-დაბიში გამართული შეხვედრების პირველი დღის შედეგების შესახებ უკრაინული მოლაპარაკებების გუნდისგან ანგარიში მიიღო.
ამის შესახებ უკრაინის პრეზიდენტმა სოციალურ ქსელ X-ზე დაწერა.
მისი თქმით, თავდაპირველად ევროპელ და ამერიკელ პარტნიორებთან საუბარი გაიმართა, რის შემდეგაც უკრაინის, აშშ-ისა და რუსეთის დელეგაციებს შორის სამმხრივი მოლაპარაკებები შედგა.
ზელენსკიმ სამმხრივ ფორმატში გამართული მოლაპარაკებები „კონსტრუქციულად და საკმაოდ შინაარსიანად“ შეაფასა.
„მოვასწარით ჰუმანიტარული ზომების აუცილებლობისა და მათი შესაძლო პარამეტრების განხილვა. ტყვეების გათავისუფლება პრიორიტეტია. დეტალურად ვისაუბრეთ უკრაინის უსაფრთხოების გარანტიების შინაარსსა და მათი გრძელვადიანი მოქმედების საფუძვლებზე. ომის განმეორების ასაცილებლად საჭიროა ქრეალური მექანიზმები,“, - განაცხადა ზელენსკიმ.
გარდა ამისა, მხარეებმა დეესკალაციისკენ მიმართული ნაბიჯების აუცილებლობაც განიხილეს.
ზელენსკის განცხადებით, მან უკრაინის მომლაპარაკებელთა გუნდს შემდგომი დიალოგისთვის მკაფიო დავალებები განუსაზღვრა - როგორც ოთხშაბათს სამმხრივ ფორმატში გასამართი მოლაპარაკებებისთვის, ისე უახლოეს დღეებში აშშ-ის პრეზიდენტის წარმომადგენლებსა და ევროპელ პარტნიორებთან შემდგომი კომუნიკაციისთვის.
„მთავარია, რეალურად მივუახლოვდეთ მშვიდობას. უკრაინის მხრიდან იქნება მხოლოდ პროდუქტიული, ხარისხიანი და გულწრფელი მუშაობა. მადლობას ვუხდი ამერიკულ მხარეს მოლაპარაკებების ორგანიზებისთვის, ხოლო არაბთა გაერთიანებულ საამიროებს - საიმედო მოლაპარაკებების პლატფორმის უზრუნველყოფისთვის“, —-დაწერა ზელენსკიმ.
აშშ-ის სახელმწიფო მდივანმა მარკო რუბიომ განაცხადა, რომ 10 ნოემბერს აბუ-დაბიში უკრაინას, აშშ-სა და რუსეთს შორის გამართული სამმხრივი მოლაპარაკებები „ძალიან პროდუქტიული“ იყო, თუმცა, მისივე თქმით, წინ ჯერ კიდევ ბევრი სამუშაოა.
მოსალოდნელია, რომ მოლაპარაკებები 11 ნოემბერს დილით განახლდება.
